Nokia бренди остида смартфонлар ишлаб чиқарадиган Финляндиянинг HMD Global компанияси бешта камерали биринчи смартфонни тақдим этди. Бу ҳақда компания сайтидаги хабарда айтилади.
Nokia 9 PureView гаджет орқа панелида Zeiss оптикаси билан жиҳозланган. Ишлаб чиқарувчилар айтишича, бешта камерадан олинган тасвирларнинг автоматик уйғунлашуви суратга олингандан кейин тасвир фокусини тартибга солишга имкон беради, шунингдек, 12 мегапиксел ҳажмдаги «ноёб динамик диапазон» беради.
HMD Global’нинг маълум қилишича, ушбу смартфон айнан фотосуратчилар учун махсус яратилган, гаджет RAW сиқилмаган шаклида суратга олади ва расмларни тўғридан-тўғри қурилмада таҳрирлаш мумкин.
Nokia 9 олти дюймли экранга эга, Qualcomm Snapdragon 845 процессорида ишлайди, унда 6 гигабайт оператив ва 128 гигабайт ички хотира бор. Аккумулятор қуввати 3320 мАс.ни ташкил қилади, дея аниқлик киритган The Verge.
Кутилишича, смартфон сотуви март ойида бошланади. АҚШда у 699 доллар туради, лекин бошқа мамлакатлардаги нархлар бозорга қараб ўзгаради.
Эслатиб ўтамиз, аввалроқ Samsung янги смартфонларни тақдим этганди.
