Январь ойида амалга оширилган ва “Soliq” иловасида рўйхатдан ўтказилган харидлардан қайтадиган 1 фоизлик кешбэк 21−25 февраль кунлари тўлаб берилади. Мос равишда февраль харидлари учун кешбэк март ойининг худди шу саналарида тўланади. Бу ҳақда Давлат солиқ қўмитаси маълум қилди.
2022 йил 1 январдан бошлаб чакана савдо, умумий овқатланиш ва аҳолига маиший хизмат кўрсатиш объектларида харид қилиб, харид чекини мобил иловада рўйхатдан ўтказган жисмоний шахсларга ой якуни билан харид суммасининг 1 фоизи қайтарилади.
“Сотиб олинган товарлар қайтарилганда тадбиркорлик субъектларида харид чекларига тузатиш киритиш имконияти мавжудлигини ва улар томонидан солиқ ҳисоботларини тақдим этиш муддатлари ҳисобот ойидан кейинги ойнинг 20-санасигача этиб белгиланганини инобатга олган ҳолда кешбэк суммаси 21-25-саналарда қайтарилишини маълум қиламиз”, — дейилади хабарда.
