21 февраля 2021
Кыргызстандагы жогорку окуу жайларында билим алгандардын 29 пайызга жакыны чет элдик студенттер. Бул тууралуу Улуттук статистика мамлекеттик комитети кабарлады.
Билдирүүгө ылайык, республика аймагындагы ЖОЖдордо 2020-2021-окуу жылында 63 миңден ашуун чет элдик студент билим алууда. Алардын 69 пайызы (44 миңге жакын) — Көз карандысыз мамлекеттердин шериктештигине кирген республикалардан келгендер. Акыркы беш жылда КМШ өлкөлөрүнөн Кыргызстанга билим алууга жол тарткандардын агымы 5,4 пайызга жогорулаган.
Андан сырткары, 2016-жылдан бери КМШга кирбеген республикалардын жаштары 6000ден 19 миңге чейин көбөйгөн. Анын ичине индиялык студенттердин саны 10 пайызга төмөндөсө, пакистандыктар алты пайыздан 31 пайызга чейин көбөйгөн.
