Кыргызстанга Жаныш Бакиевдин жубайы Орозгүл Токторбаева учуп келди. Бул тууралуу ишенимдүү маалымат булагы Sputnik агенттигине билдирди.
Анын айтымында, Токторбаева өлкөгө кечээ, 26-январда, башка фамилия менен кирген. Агенттиктин маектеши аны сүрөтүнөн таанып калышканын билдирди.
Буга чейин Токторбаеванын Кыргызстанга келгени боюнча маалымат соцтармакка тараган. Ырчы Айчүрөк Султанова аны менен чогуу түшкөн сүрөтүн жарыялап “келгениңе абдан кубанычтабыз” деп жазган. Ошондой эле Токторбаеванын жакшы долбоору бар экенин белгилеген. Ырчы кийинчерээк сүрөттү өчүрүп салганы менен ал тарап кеткен.
Жаныш Бакиев — 2010-жылы апрель айында өлкөдөн куулган президент Курманбек Бакиевдин бир тууганы. Агасы президент болуп турган мезгилде Мамлекеттик күзөт кызматын жетектеген. Кийин алар Беларустан саясий баш паанек алышкан. Учурда Минск шаарында жашаары айтылат.
Ал 2010-жылдын 7-апрелиндеги бир нече адам өмүрүн алган каргашалуу окуяга жана башка оор кылмыштарга күнөөлөнүп, Аскердик сот тарабынан сыртынан өмүр бою эркинен ажыратылган. 2016-жылдын июль айында Жогорку сот 7-апрель боюнча акыркы чечимин чыгарган. Анда сот коллегиясы Аскердик соттун өкүмүн күчүндө калтырган болчу.
