Ведомство 2016-жылы эмчи-домчунун дарылоосунан кийин 56 жаштагы аял каза болгонун эскертти.
Саламаттык сактоо министрлиги эмчи-домчу Хашим Зайналиевге чара көрүүнү суранып күч органдарына кайрылат. Бул тууралуу аталган ведомстводон кабарлашты.
Буга чейин ЖМКлар Зайналиевден "дарыланган" беш жаштагы кыз ооруканага оор абалда түшкөнүн жазып чыгышкан. Наристе ак кан менен жабыркап келет. Эмчи аны "толугу менен жакшы кылам" деп кепилдик бергени айтылган. Ал эми кыздын ата-энеси милицияга арыз жазган эмес.
Саламаттык сактоо министрлигинен билдиришкендей, жарандар "Зайналиевдин ишине бөгөт кое албайсыңар" деп министрликти айыптап жатат.
Ведомство 2016-жылы эмчи-домчунун дарылоосунан кийин 56 жаштагы аял каза болгонун эскертип, Зайналиевдин медициналык билими жана ишмердүүлүгүнө уруксат берген лицензиясы жок экенин белгилейт. Ошол учурда аялдын өлүмү боюнча кылмыш иши козголуп, бирок октябрь айында ал кайра токтотулган.
Саламаттык сактоо министрлиги бул окуядан кийин укук коргоо органдарына бир нече ирет арыз жазып, 2017-жылы Зайналиевдин Көк-Жар конушундагы клиникасы жабылган.
"Бирок бүгүнкү күндө Зайналиев бейтаптарды дарылоосун кайрадан улантып жатат", — деп министрликтен маалымдашты.
Эми ведомство Башкы прокуратура, ИИМ, УКМК, Мамлекеттик салык кызматына кайрылып, Зайналиевди жоопко тартууну суранат.
Дагы: sputnik.kg, фото -© AFP 2018 / DOMINICK REUTER
