10 декабря 2020
Быйыл январдан ноябрь айына чейин Өзбекстанга Орусияда каза болгон 211 мигранттын сөөгү жеткирилди. Бул тууралуу өлкөнүн ишке орноштуруу жана эмгек мамилелери министринин орун басары Баходир Умрзаков билдирди.
«2020-жылы мамлекеттин эсебинен Орусиядан 211 өзбекстандыктын сөөгү алып келинди. Мындан тышкары алардын үй-бүлөлөрүнө каржылык жардам берилип, тажиясы өткөрүлдү», — деди министрдин орун басары.
Умрзаков мигранттар кандай себептерден улам каза болушканын айткан жок.
Көбүнчө Орусиядагы мигранттар өрт, курулуш аянттарындагы кырсыктар сыяктуу кокустуктардан жана улутчулдардын кол салуусунан улам көз жумушат.
