Ереванда өкмөткө каршы акция өтүп, метролор тосулду. Бул тууралуу Sputnik Армения жазды.
Эске салсак, Тоолуу Карабах боюнча үч тараптуу келишимге кол коюлгандан кийин Арменияда премьердин отставкасын талап кылган нааразычылык акциялары башталган. Мындан сырткары, 5-декабрда оппозиция премьер-министр Никол Пашинян жана анын командасына 8-декабрга чейин кызматтан кетүү талабын коюшкан. Талаптар аткарылбаса өкмөткө баш ийбей турганын билдиришкен.
Өкмөткө каршы акцияда жарандар Еревандагы метронун кыймылын токтотушкан. Sputnik Армениянын кабарчысы ондогон митингчи метронун "Горцаранаин" станциясына кирип, поезддердин жүрүшүн токтотконуна күбө болгон. Бул өз кезегинде бүтүндөй шаардагы метрополитендин жабылышына алып келген.
Нааразычылык билдирип чыккандар вагондун эшиктеринин ортосуна туруп алышып, “Никол — чыккынчы” деп кыйкырышкан. Акцияга катышпаган жүргүнчүлөр станциядан кетүүгө аргасыз болушканы айтылды.
Премьер Никол Пашиняндын кызматтан кетүүсүн талап кылган дагы бир акция Армениянын Улуттук коопсуздук кызматынын имаратынын жанында өткөн. Чогулгандар УККнын имаратынын алдындагы Налбандян көчөсүн жабышкан. Полиция жолду ачуу үчүн аларга 10 мүнөт убакыт берген.
Ал арада Туманян көчөсү жана Маштоца проспектинин кесилишинде демонстранттарды кармоо иштери жүрүп жатканы кабарланды. Армениянын полициясы шаардын ар кайсы жерлеринде жолду тоскон 34 активист кармалганын билдирди.
