Кыргызстандыктарды чет жакка мыйзамсыз жолдор менен жөнөтүү боюнча канал аныкталды. Бул тууралуу 11-ноябрда Ички иштер министрлигинин (ИИМ) маалымат кызматы кабарлады.
Мекеменин басма сөз кызматы Экстремизмге жана мыйзамсыз миграцияга каршы кызматына таянып маалымдагандай, жумушка орноштуруу менен алектенүүчү жеке агенттиктердин биринин кызматкерлери кыргыз жарандарын Перс булуңундагы өлкөлөргө мыйзамсыз жолдор аркылуу жөнөтүп жүргөн деген шек бар. Милиция ал агенттик чет жакка жумушка орноштурууга уруксат берүүчү документи жок иштеп жүргөн деп эсептейт.
Факт Кылмыштардын жана жоруктардын бирдиктүү реестрине Жазык кодексинин “мыйзамсыз миграция уюштуруу” деген беренесинин негизинде каттого алынып, агенттиктин жетекчисине шектүү экени тууралуу кагаз тапшырылды.
Кыргызстанда жумушсуздук негизги социалдык-экономикалык көйгөйлөрдүн бири. 6,5 миллион калктын 2,5 миллионго жакыны эмгекке жарамдуу, алардын арасынан 200 миңге жакыны жумушсуз.
АКШнын Мамлекеттик департаментинин дүйнөдөгү адам аткезчилиги жана эмгекке мажбурлоо боюнча абал тууралуу баяндамасында 2017-жылы курмандыктардын саны 100 миңден ашканы айтылган. Бул баяндамада 187 мамлекеттин арасынан Кыргызстан минималдуу стандарттар толук камсыздала элек, бирок адам аткезчилигин жана эмгекке мажбурлоону токтотуш үчүн олуттуу аракеттер көрүлүп жаткан 117 өлкө менен бирге экинчи топко кошулган.
