Депутат журналисттерге берген маегинде бизнеске мамлекеттик кызматтан кеткенден кийин аралашканын белгиледи.
Жогорку Кеңештин депутаты Кубанычбек Жумалиев өзүнө таандык 34 компаниянын жетөө гана иштеп жатканын билдирди.
Ал журналисттерге берген маегинде бизнеске мамлекеттик кызматтан кеткенден кийин аралашканын белгиледи.
"Мен илимпоз, билимдүү, мыйзамды сыйлаган адам катары эч качан коррупциялык иштерге катышкан эмесмин. Эмне тапсам өз эмгегим менен жеттим. 2005-жылы мартта жумуштан кеткенде менин бир батир, Аламүдүн районунда эки жер тилкем, келинчегимдин эки-үч жер тилкеси гана бар болчу. 2005-2017-жылдарга чейин күнү-түнү бизнес менен алектенип, чет жактан инвесторлорду тартып ишканаларды ачтык", — деди Жумалиев.
Депутат муну менен өлкөдө 700дөн ашык адамды жумуш менен камсыздаганын айтып өттү.
"Деген менен менин атыма катталган 34 компаниянын тогузу гана калып, калганы жабылып калды. Анын экөө коомдук фонд, үчөө билим берүү мекемеси, төртөө компания. 2015-жылы 15ке жакын компанияны ишенимдүү башкарууга өткөрүп берип депутат болуп келгем", — деди Жумалиев.
Эл өкүлү жабылган компаниялар өзүн актабай калган сыяктуу табигый көрүнүштөн улам жабылганын кошумчалады.
Белгилей кетсек, кечээ Финпол Кубанычбек Жумалиевге тиешелүү компанияларга тинтүү жүргүзгөн.
