Беларуста мурдагы президент Курманбек Бакиев, уулу Марат жана бир тууганы Жаныш Бакиев жүрөт. Буга чейин Кыргызстан сурам жөнөткөнү менен аталган мамлекет баш тарткан.
Беларусь Республикасына Бакиевдерди экстрадициялоо боюнча кайрадан өтүнүч жөнөтүлүшү мүмкүн. Бул тууралуу журналисттерге Башкы прокуратуранын эл аралык укук бөлүмүнүн башчысы Асылбек Ахматов билдирди.
Эске салсак, Беларуста мурдагы президент Курманбек Бакиев, уулу Марат жана бир тууганы Жаныш Бакиев жүрөт. Буга чейин Кыргызстан сурам жөнөткөнү менен аталган мамлекет баш тарткан.
"Бул кишилер мамлекеттер аралык издөөгө алынган. Азыр Беларуста жүрүшөт. Эгер алар үчүнчү мамлекеттин аймагында жүргөн болсо, экстрадициялоо маселеси көтөрүлөт. Бүгүнкү күндө документтер менен мыйзамдуу түрдө күчүнө кирген өкүмдөрдү карап чыгып анализ кылып, эгер мүмкүнчүлүк болсо, биз дагы бир жолу Беларуска сурам жөнөтөбүз", — деди Ахматов.
Кыргызстандын экинчи президенти Курманбек Бакиев 2010-жылы 7-апрелде анын бийлигине каршы чыккандарды аттырган окуяда фигурант катары каралган. Жогорку сот аны сыртынан өмүр бою кесип, жаш курагынан улам бул өкүм 30 жылдык абакка алмаштырылган.
Ал эми Мамлекеттик күзөт кызматын жетектеген бир тууган иниси Жаныш Бакиев сыртынан өмүр бою кесилген.
Качкын президенттин тун уулу Марат Бакиев бир кезде УКМКнын төрагасынын орун басары болуп иштеген. Ал сыртынан 27 жылга эркинен ажыратылган.
