Кыргызстандын шайлоо мыйзамдарына ылайык, Жогорку соттун чечими акыркы болуп саналат жана кайра даттанууга жатпайт.
Жогорку сот парламенттик шайлоону кайра өткөрүү боюнча Борбордук шайлоо комиссиясынын апелляциялык арызын карабай, артка кайтарды. Бул туурасында аталган органдын маалымат кызматы билдирди.
Белгилей кетсек, Бишкек шаардык административдик соту парламенттик шайлоону 20-декбарга дайындоо жөнүндө БШКнын токтомун жокко чыгарып салган. Судья 4-октябрдагы шайлоонун жыйынтыгы чыга электе кайра өткөрүү дайындалган деген жүйө келтирген. Бирок БШКнын юристтери ал чечимге макул болбой Жогорку сотко кайрылышкан. Кечээ, 29-октябрда, "мамлекеттик пошлина (товардан алынуучу салык) төлөнгөнү туурасында далилдер жок" деп доо арызды артка кайтарган. Ошол эле күнү БШК документтерди толуктап кайрадан апелляциялык арыз жиберген.
Жогорку сот бул ирет кассациялык даттануу мөөнөтү (үч күн) өтүп кеткенин айтып арызды карабай койду.
"Шайлоо мыйзамдарына ылайык, Жогорку соттун чечими акыркы болуп саналат жана даттанууга жатпайт. Арыз жиберүү мөөнөтү калыбына келтирилбейт, мөөнөтү аяктагандан кийин даттануу кабыл алынбайт", — деп билдирди Жогорку соттон.
Белгилей кетсек, 21-октябрда Борбордук шайлоо комиссиясы парламенттик шайлоону кайра өткөрүүнү 20-декабрга белгилеген. Анын эртеси Жогорку Кеңеш шайлоонун мөөнөтүн жылдыруу боюнча, башкача айтканда, БШК таянып иш алып барып жаткан беренени 1-июнга чейин токтото туруу мыйзамын кабыл алды. Ал документке президенттин милдетин аткаруучу Садыр Жапаров да кол койгон.
Ал арада Борбордук шайлоо комиссиясына 48 саясий партия шайлоого катышуу ниетин билдирди.
