Өлкө башчы Сооронбай Жээнбеков экс-президент Роза Отунбаева менен жолугушту. Кабарды мамлекет башчынын маалымат катчысы Толгонай Стамалиева тастыктады.
Тараптар өлкөдө түзүлгөн кырдаалды талкуулап, андан чыгуу үчүн жалпы улуттук консенсуска келүү зарылдыгын айтышты.
"Жолугушуу жекшемби күнү болду. Президент өлкөдөгү абалга тынчсызданып, андан чыгуу боюнча өз көз карашын сунуштаган бардык коомдук жана саясий ишмерлер менен жолугууда", — деп айтылат билдирүүдө.
Эске салсак, Бишкек шаарында 5-октябрда Жогорку Кеңешке болгон парламенттик шайлоонун жыйынтыгына нааразы болгон жарандардын толкундоосу жаралып, кечке "Ала-Тоо" аянтында турган. Ал эми кечинде аларды күч органдары кууп таратууга аракет кылган. Көп өтпөй эл кайрадан "Ала-Тоо" аянтына келип, андан соң Ак үйдү басып алган. Кийин экс-президент Алмазбек Атамбаевди, Садыр Жапаровду жана бир катар саясатчыларды абактан бошотуп алган.
6-октябрда БШК шайлоонун жыйынтыгын жокко чыгарган. Кечинде парламент премьер-министрликке Садыр Жапаровдун талапкерлигин жактырган.
7-октябрда ар кайсы ишканалар аларды басып алууга аракеттер болгонун айткан. Митинг уланып, митингчилердин бир бөлүгү Садыр Жапаровду колдосо, экинчиси люстрация мыйзамын талап кылган.
8-октябрь күнү президент Сооронбай Жээнбековго айрым депутаттар импичмент процедурасын баштаганын кабарлашты.
9-октябрда төрт партия башын бириктирип, премьерликке Өмүрбек Бабановдун талапкерлигин сунуштады. Алмазбек Атамбаев менен Өмүрбек Бабановдун колдоочулары "Ала-Тоо" аянтындагы митингге кошулуп, тараптардын ортосунда кагылышуу болгон. Атамбаевдин автоунаасына ок атылган.
10-октябрда Жогорку Кеңештин депутаттары кезексиз жыйынга чогулуп, Садыр Жапаровдун тарапкерлигин өкмөт башчылыкка колдоп беришкен. Ушул эле күнү мурдагы президент Алмазбек Атамбаев баш болгон митингчилер тарабынан бошотулган саясатчылар кайрадан камала баштаган.
11-октябрда Аида Касымалиева баштаган бир катар депутаттар кезексиз жыйында кворум болбогонун айтып, Жапаровдун кызматка отурушун легитимсиз деп чыгышты.
