Премьер-министр Кубатбек Боронов Республикалык ыкчам штабдын чукул жыйынын өткөрүп, өлкөдө эпидемиологиялык кырдаалдын кайрадан курчуп бара жатканына тынчсызданды. Бул тууралуу өкмөттүн маалымат кызматынан кабарлашты.
Жыйындын жүрүшүндө учурдагы эпидемиологиялык кырдаал талкууланып, премьер айрым аймактарда санитардык-эпидемиологиялык коопсуздук чаралары сакталбай жатканына байланыштуу Өкмөттүн облустардагы ыйгарым укуктуу өкүлдөрүнүн жана ИИМдин ишине сын айтты.
"Баткен, Ош облустарындагы жана Бишкек шаарындагы жарандардын арасында коронавирус инфекциясы көп катталып жатат. Бул аймактарда COVID-19 менен ооруп жаткандардын жана өпкөсү сезгенгендердин көрсөткүчү жогору. Социалдык түйүндөрдө саясий партиялардын эл менен жолугушуулары боюнча сүрөт жана видеолор көп чыгууда. Анда бет кап тагынуу режими жана социалдык аралык сакталбай эле. Той-аштарды өткөрүүгө тыюу салынганына карабай, кафе-ресторандарда массалык иш-чаралар өтүүдө. Бул боюнча жергиликтүү бийлик жана Ички иштер министрлиги чара көрбөй жатат. Рейддер жетиштүү деңгээлде жүргүзүлгөн жок. Облус жетекчилери жана акимдер, өз аймагыңардагы эпидемиологиялык абалга жооптуусуңар", — деди Боронов.
Ошондой эле ал оор жана өтө оор абалдагы бейтаптарга өзгөчө көңүл буруу тапшырмасын берди.
"Биздин негизги максат – мекендештердин өмүрүн сактоо. Оор жана өтө оор абалдагы бейтаптардын жагдайын жакшыртуу үчүн, ар бирине индивидуалдуу түрдө мамиле кылуу керек. Зарыл болсо дарыгерлердин консилиумуна кайрылуу шарт", — деди өкмөт башчы.
Штаб жыйынында стационарлардын, мобилдик топтордун иши талкууланып, зарыл болгон учурда бул медициналык кызматтар өз ишин кайрадан баштоого даяр болушу керектиги белгиленди.
Отурумдун соңунда Боронов аймактардагы ооруканаларды дары-дармек, медицина кызматкерлерин жеке коргонуучу каражаттар менен үзгүлтүксүз камсыздоо тапшырмасын берди.
