Коронавирус пандемиясынын экинчи жана кийинки толкундарын алдын алуу үчүн калкты массалык түрдө эмдөө керек. Бул тууралуу Гамалея атындагы Россиянын эпидемиология жана микробиология улуттук илим-изилдөө институтунун жетекчиси Александр Гинцбургдун айтымына таянып "Известия" басылмасы жазды.
Адис эмдөө боюнча пикири менен "Биринчи каналдын" эфиринен бөлүшкөн.
"Бардыгыбыз коронавируска каршы вакцина албасак, тилекке каршы, экинчи, үчүнчү, ал тургай онунчу толкун боло берет", — деди ал.
Россиянын адистери коронавирусту профилактика кыла турчу дүйнөдөгү биринчи вакцинаны жасашты. Ал "Спутник V" деп аталат. Москвада изилдөөдөн өткөн вакцина менен эмдөө башталды. Россиянын саламаттык сактоо министри Михаил Мурашко коронавируска каршы вакцинаны 300 киши алганын билдирген. Алардын 14 пайызы алсыз болуп, булчуңдары ооруп жатканын айткан. Бирок адистер белгилегендей, бул белгилер бир сутканын ичинде кетет.
Кыргызстанда болсо сасык тумоого каршы эмдөө бүгүн, 16-сентябрда, башталат. Вакцина биринчи кезекте өнөкөт оорусу бар, иммунитети алсыз, көп ооруган балдар менен кош бойлууларга, жашы 65тен өтүп калган адамдарга, балдар үйү менен мектеп-интернаттарда тарбиялангандарга, карылар үйүндө жашагандарга, ошондой эле медиктерге сайылат.
