Аткезчилик кылганы үчүн соттолгон Жогорку Кеңештин экс-депутаты Дамирбек Асылбек уулуна мунапыс берилгендиктен, жаза мөөнөтү бүтө электе бошотулду. Бул туурасында Жогорку соттун маалымат кызматы билдирди.
Ага ылайык, Соттук коллегия соттолуучунун адвокаты жаңы жагдайларга байланыштуу ишти кайра кароо боюнча жазган арызын канааттандырып, Жогорку соттун 2019-жылдын 15-ноябрындагы токтому өзгөртүлгөн.
Дамирбек Асылбек уулу КР Кылмыш-жаза кодексинин (1997-жылкы редакция) 231-беренесинин 1-бөлүгү ("Кылмыштуу топ түзүү") боюнча кылмыш жоопкерчилигинен бошотулган. Ошону менен катар 2017-жылкы редакциядагы Жазык кодексинин 223-беренесинин 2-бөлүгү ("Экономикалык аткезчилик") менен үч жылга кесилген.
"Дамирбек Асылбек уулу "Улуу Ата Мекендик согуштагы Жеӊиштин 75 жылдыгына жана 2010-жылдагы Элдик Апрель революциясынын 10 жылдыгына байланыштуу мунапыс жөнүндө" Кыргыз Республикасынын мыйзамынын 1-беренесинин 4-пунктуна ылайык жазадан бошотулду", — деп айтылат маалыматта.
Ал эми 2019-жылдын 15-ноябрындагы калган өкүмдөр өзгөрүүсүз калды.
Дамирбек Асылбек уулунун иши
2018-жылдын 15-16-февралында Казакстандын укук коргоо органдары атайын операция жүргүзгөн. Натыйжада бажы постторунда иштеген уюшкан кылмыштуу топтун 8 мүчөсү жок кылынган. Колго түшүрүлгөндөрдүн арасында ЖК депутаты Дамирбек Асылбек уулу да болгон. Кийинчерээк анда Казакстандын жарандыгы бар экени тастыкталып, депутаттык мандаттан ажыратылган.
Асылбек уулуна Казакстанда "Улуттар аралык кылмыштуу топ түзүү" жана "Экономикалык аткезчилик" беренелери боюнча айып тагылган.
Ал эми 2019-жылы 24-апрелде Алматы шаарынын адистештирилген райондор аралык соту Асылбек уулун 10 жылга эркинен ажыраткан. Өкүмгө ылайык, ал жаза мөөнөтүн өтөп бүткөн соң Казакстандан чыгарылмак.
Бирок 18-ноябрда экс-депутат менен кошо кармалган дагы эки кыргызстандык мекенине экстрадицияланган. Асылбек уулу Молдовановка айылындагы №27 абакта, эки шериги Петровка айылындагы №8 түрмөдө жаза мөөнөтүн өтөп жаткан.
21-августта ЖАМК анын абактан чыкканы туурасында маалымат берген.
Дамирбек Асылбек уулу 2015-жылы "Кыргызстан" фракциясынан Жогорку Кеңешке депутат болгон.
