19 августа 2020
Мектептер үчүн талаптар жана 1-класстын окуучуларынын ата-энелерине сунуштамалар иштелип чыкты. Бул туурасында Саламаттык сактоо министрлигинин Оорулардын алдын алуу жана мамлекеттик санитардык-эпидемиологиялык көзөмөл департаментинин жалпы гигиена боюнча дарыгери Мария Кушубакова билдирди.
Белгилей кетсек, быйыл мектеп окуучуларын аралыктан окутуп, 1-класстарды гана күн сайын мектепке барып окутуу чечими кабыл алынган.
Аталган департамент Билим берүү жана илим министрлиги менен биргеликте мектептер үчүн алгоритм иштеп чыкканы айтылат.
Талаптар жана сунуштамалар:
- Ар бир класста окуучулардын саны азайтылышы керек, эгерде класста 25-30 окуучу болсо, аларды эки топко бөлүп, шахматтык тартипте отургузуу зарыл;
- Мектеп директорлору санитардык талаптардын аткарылышына жана дезинфекциялоо иштерине жооптуу;
- Балдар бет кап тагынып, атайын кол аарчыларды жана антисептиктерди пайдаланышы керек, аларды ата-энелери камсыздоого тийиш;
- Мектептер дезинфекциялоочу каражаттар менен камсыздалышы шарт;
- Ата-энелерге балдарын өздөрү алып келип, алып кетүүсү сунушталат;
- Аралыкты сактоо үчүн мектептерде эки чыгуу/кирүү эшиги болушу зарыл;
- Санитардык ченемдерди жана тийиштүү шарттарды сактоо үчүн мектептер суу менен камсыздалып, канализация жана жылытуу сезонуна даярдык көрүлүшү керек.
