Жапайы жаныбарлар арасында жырткычтык эле эмес, адам баласына өрнөк боло турган учурлар арбын кездешет.
Түштүк Африкадагы Крюгер жаратылыш коругунда туристтер жаалданган арстандардан камандын кантип аман калгандыгына күбө болушту.
Видео Kruger National Park Videos деп аталган каналга жайгаштырылган.
Видеодон алты-жети арстан каманды качырып сала берип, андан кийин чаңга аралаштырып басып калгандыгын көрүүгө болот. Эгерде ага капысынан буйволдор жардамга келбегенде, тирүү калбасы бышык эле. Чаңы асманга сапырылып калган кармашка буйволдор үйүрү менен чуркап келгенин кадрдан байкоого болот. Ача туяктууларды көргөн жырткычтар четке чыга берген.
Маалыматта камандын кийинки тагдыры эмне болгону жазылган эмес. Антсе да бул жаныбарлардын башка корукташынын өмүрүн сактап калышы интернет колдонуучулардын суктануусун жараткан. Алар видеонун алдына бир топ пикирлерин калтырган.
