Быйылкы жылы кооптуу кесиптер рейтингинде дарыгерлер көч башына келди. Өмүр сакчылары бул сапар шахтачылардан, өрт өчүрүүчүлөрдөн жана аскер кызматкерлеринен озуп, алдыга чыкканын РИА Новости жарыялаган.
Иликтөө 30-июлдан 3-августка чейинки аралыкта эл жашаган 296 аймактагы россиялыктарга жүргүзүлгөн ачык сурамжылоодогу маалыматтарга негизделген.
"Өткөн жылдагы иликтөөлөргө салыштырмалуу кооптуу кесиптердин рейтингинде дарыгерлер биринчи жолу алдыга чыкты: буга чейин алардын жумушу эң кооптуу экенин 2-3 пайыз гана россиялык белгилешкен. Бүгүнкү күндө дарыгерлердин жумушу эң коркунучтуу экенинин ар бир бешинчи киши айтууда", - деп айтылган иликтөөдө.
Россиялыктардын 20 пайызы дарыгердин жумушу азыркы учурда эң кооптуу кесип деп эсептеген. Шахтачылардын ишинде тобокелдик көп дегендер 10 пайыз болгон. 8 пайыз респонденттердин пикири боюнча, кооптуу жумушту өрт өчүрүүчүлөр жасашат. Аскер кызматкерлеринин жана Өзгөчө кырдаалдар министрлигинин куткаруучуларынын ишмердүүлүгү кооптуу дегендер 6 пайызды түзгөн.
Мындан сырткары, 4 пайыз добушка айдоочу, күч органынын кызматкери жана саясий ишмер кесиптери ээ болушту. Учкучтун жумушу эң коркунучтуу деген респонденттер 2 пайызга жетсе, журналист, мугалим жана сапер деген кесиптерге 1 пайыздан добуш тийген.
Сурамжылоого катышкандар дарыгерлик кесиптин ээлеринин ишин эрдикке тете экендигин кошумчалашкан.
