Мэриядан коомдук тамактануу жайлары жана соода борборлору кандай иштээрин, ошондой эле азыркыга чейин тыюу салынган субъектилер боюнча айтты.
Бишкекте соода борборлорунун, тамактануучу жайлардын жана коомдук транспорттун иш убактысы узартылды. Муну ырастаган токтомго шаар башчысы Азиз Суракматов кол койгонун мэриядан кабарлашты.
Автобус, троллейбус жана маршруттук таксилер эми 7:00дөн 11:00гө чейин жана 14:00дөн 23:00гө чейин милдеттүү түрдө дезинфекциялоо менен иштешет. Дем алыш күндөрү иштебейт.
Аянты 100 чарчы метрден ашкан соода борборлор, дүкөндөр жана супермаркеттер саат 7:00дөн түн жарымга чейин ачык болот.
Тамактануучу жайларга 7:00дөн 22:00гө чейин иштөөгө уруксат берилди. Жеткирип берүү кызматтары өз ишин улантат, ал эми тамакты алып кетүү каалаган убакта мүмкүн.
Базарлар мурдагыдай эле саат 9:00дөн 17:00гө чейин иштей берет.
"Көчө соода жана тейлөө объектилерине (батут, велосипедди ижарага алуу пунктулары жана башкалар), түнкү клубдар, барлар, караоке жана башка көңүл ачуучу жайлар менен балдар аянтчаларынын иштөөсүнө тыюу салынган", - деп билдирет мэрия.
Бул чаралар өзгөчө токтом чыкканга, тагыраагы, Бишкек шаарында эпидемиологиялык абал жакшырганга чейин иштейт. Муниципалитеттен тартип бардыгына бирдей экендиги айтылды.
Эскерте кетсек, мэрия 22-июлда Бишкекте соода жайлары менен ири дүкөндөрдүн иш тартибин өзгөрткөн болчу.
