Күндүн нурундагы ультрафиолет коронавирусту жакшы өлтүргөндүктөн, аны COVID-19 менен күрөшүү үчүн колдонсо болот. Бул тууралуу Милан мамлекеттик университетинин (Италия) профессору, иммунолог Марио Клеричи РИА Новости агенттигине айтып берди.
Клеричи жетектеген окумуштуулар тобу ультрафиолет нурлануусу менен вирустун үч түрүн жок кылууга аракет кылышкан. Биринчиси — анча күчтүү эмес, экинчиси — COVID-19дун оор формасына чалдыктырган күчтүү түрү. Үчүнчүсү — жер жүзүндө аналогу жок өтө күчтүү формасы.
"Адистер вирустарды адам жөтөлүп же чүчкүргөн учурда бөлүнүп чыккан сыяктуу кылып, бир тамчы сууга кошуп туруп ультрафиолет нуруна какташкан. Жыйынтыгында бир нече секунддун ичинде вирустун бардык түрлөрү зыянсыздандырылган", — деп айтылат кабарда.
Окумуштуулар өздөрү чыгарган жыйынтыкты дагы бир ирет тастыктоо үчүн Италиянын Астрофизика боюнча улуттук институтунун адистерине кайрылышкан. Алар дагы быйылкы жылдын январь-май айларынын аралыгында иликтөө жүргүзүп, коронавирус чындап эле ультрафиолет нурлануусу алдында алсыз экенин аныкташкан.
Мындан улам окумуштуулар азыркы учурда жай чилдеси болуп жаткан мамлекеттерде коронавирус басаңдап калганын айтууда. Ал эми ысыкка карабай вирус жайылып жаткан Индия, Пакистан, Бангладеш сыяктуу мамлекеттерде жаан-чачын, бүркөк аба ырайы же башка ушул сыяктуу себептерден улам ультрафиолет жер бетине жетиштүү өлчөмдө жетпей жатышы мүмкүн экени айтылды.
Дүйнөлүк саламаттык сактоо уюму 11-мартта коронавирус инфекциясын пандемия деп жарыялаган. Учурда вирус жуктургандардын саны дүйнө жүзү боюнча 14 508 892ге жетти.
