Министрдин орун басарынын айтымында, Бишкекте эпидемиологиялык абал дагы эле курч. Айрым бейтаптар вирусту кайдан жуктурганын билбей, булагы белгисиз болуп калууда.
Аттуу-баштуу адамдар той-ашка уруксат берүүнү суранып жатат. Бирок өлкөдө, айрыкча Бишкекте, эпидемиологиялык абал турукташа элек. Бул тууралуу саламаттык сактоо министринин орун басары Нурболот Үсөнбаев брифинг учурунда билдирди.
Анын айтымында, Бишкекте эпидемиологиялык абал дагы эле курч. Айрым бейтаптар вирусту кайдан жуктурганын билбей, булагы белгисиз болуп калууда.
"Вирус кайдан жукканын айрымдары билбей калып жатат. Бул кооптонууну жаратууда. Азыркы учурда бир топ мекеме, объектилердин ишмердүүлүгүнө дагы эле уруксат бериле элек. Аттуу-баштуу адамдар эле "той-ашка уруксат берсеңер" деп суранып жатат. Бирок андай жерлерге көп адам чогулат. Ошондуктан буга азырынча уруксат бере албайбыз. Өзгөчө Бишкек шаарында абал дагы эле курч, 600дөн ашык киши вирус жуктурду. Мындан улам бул кырдаалга элдин түшүнүү менен мамиле кылып туруусун суранат элек. Банкет уюштурган ассоциация да кайрылды, бирок азырынча той-ашка киргизилген чектөө алынбайт", — деди Үсөнбаев.
Министрдин орун басары абал турукташкандан кийин гана мындай иш-чараларга уруксат берилерин кошумчалады.
Кыргызстанда коронавирус жуктургандардын саны 2166га жетип, андан 1668и айыкты. Тилекке каршы, оорудан 26 бейтап көз жумду.
