Коронавирус кооптуулугунан улам жергиликтүү кеңештерге шайлоону кийинкиге жылдыруу боюнча Республикалык штаб Борбордук шайлоо комиссиясына кайрылып, бир нече сунуш берген.
Кыргызстандагы карантиндик кырдаалга карабай эл каттоо улантыла берерин вице-премьер Алтынай Өмүрбекова брифинг учурунда билдирди.
Вице-премьерге Sputnik Кыргызстандын кабарчысы: “Эл каттоо учурунда кызматкерлер ар бир үйдү кыдырып көп адам менен байланышта болот. Мындан вирусту жуктуруп алуу кооптуулугу жогору болушу мүмкүн. Эл каттоону токтотуп турууга болобу?” - деген суроо берди.
“Эл каттоо иштери токтотулбайт. Эл кыдырган кызматкерлер санитардык нормаларды сактап, бет каптарды кийип жүрүшөт”, — деди Өмүрбекова.
Ал эми жергиликтүү кеңештерге шайлоону кийинкиге жылдыруу боюнча берилген суроого аталган маселе каралып жатканын айтты. Республикалык штаб Борбордук шайлоо комиссиясына жол-жобосун карап чыгууга сунуш бергендигин билдирди.
“Ал эми шайлоо күнү добуш берүүгө келгендерди кезек-кезеги менен дистанцияны сактап өткөрүү эрежесин иштеп чыгабыз. Саясий партияларга дагы элди көп чогултуп жолугушууларды өткөрбөй турууну сунуштоодобуз ”, — деди Өмүрбекова.
Белгилей кетсек, шаардык жана айылдык кеңештерге шайлоо 12-апрелде өтөт. Ал эми 13-марттан тарта бир айлык үгүт иштери башталган.
