Кытайда жаңы типтеги коронавирус илдети жайылып, дүйнө элин тынчсыздандырууда. Мындай коркунучтуу оору аба аркылуу жана адамдан адамга жугары айтылды. Мунун кесепетинен соңку маалымат боюнча каза тапкан адамдардын саны 80ге жетип, 2800дөй киши ооруп жатат.
Кыргызстандын тышкы иштер министринин орун басары Нуран Ниязалиев сөз болуп жаткан Ухань шаарында учурда 15 кыргызстандык (14 студент, бир ишкер) жашап жатканын билдирди. Бактыга жараша, алардын эч кимисине оору жуккан эмес. Ниязалиевдин айтымында, буга чейин ал жакта Кыргызстандын 50 жараны болгон. Жаңы жылдан кийинки каникулда көбү мекенине жана башка шаарларга чыгып кеткен.
Sputnik Кыргызстандын кабарчысы азыркы тапта Ухань калаасында жашап жаткан кыргызстандык студент Айко Мамбеталиева менен баарлашып, кандай күндү баштан кечирип жатканын сурады. Ал Кытай борбордук классикалык университетинде 4-курста окуйт.
— Шаарда кырдаал кандай болуп жатат?
— Учурда абал туруктуу, тынч, карантин эрежелерин сактап жатабыз. Адамдар мүмкүн болушунча көчөдө жүрбөгөнгө аракет кылууда. Чыкса да азык-түлүк алганы эле барышат. Карантин жарыяланган күндөн тартып студенттик жатаканадан баш көтөрбөй жатам. Азык-түлүк жана башка керектүү нерселерди дүкөндөн буюртма берип алдырам. Биринчи беш күндө эч жакка чыккан жокмун, азыр көчөдө жүрүү анча коркунучтуу болбой калды.
— Жугуштуу вирус тууралуу маалымат тарагандан кийин чынында эле шаар бош калдыбы?
— Калаанын бош калышы, биринчиден, кытайлардын Жаңы жыл майрамы менен байланыштырсак болот. Бул убакта жергиликтүүлөр башка шаарларга жана провинцияларга кетет. Айрым бөлүгү чек ара жабылып чыгып кетүүгө жетишпей калган. Мен бул жерде төрт жылдан бери жашайм, ушул учурда калаанын бош калышы адаттагыдай эле көрүнүш. Бирок вируска байланыштуу көчөдөгү адамдардын саны кескин азайып кетти. Эл үйдөн чыкпай эле отурат.
— Кафе менен супермаркеттер иштеп жатабы?
— Азыр көптөгөн супермаркеттер ачылып, азык-түлүк кенен. Соцтармакта жазгандай ачка калгандар жок. Айрым оюн-зоок имараттары жана коомдук тамактануучу жайлар жабык турат.
— Ооруну жуктуруп албаш үчүн кантип коргонуп жатасыздар, университетте кандай чаралар колдонулууда?
— Окуу жайдан баарыбызга бет кап, самын жана күн сайын дене табын текшерип туруу үчүн танометр беришти. Ар таңда бөлмөлөргө дезинфекциялоочу каражаттарды чачып турушат.
Кечээ акысыз тамак берген ашкана ачылды. Алар жаныбыздагы университеттин студенттерине да тамак-аш жеткиришүүдө. Окуу жайдын жетекчилиги студенттерге аябай камкордук көрүп жатканын айткым келет. WeChat мессенджери аркылуу студенттер мугалимдер жана кураторлор менен тынымсыз байланышта болууда.
— Адамдар турган жеринен жерге кулап жаткан видео жана шаарды зомби-апокалипсиске айланды деп соцтармакта тарап жаткан кабарга канчалык ишенсе болот?
— Үрөй учурган видеолордун баары фейк. Анчалык жүрөк үшүн алган учурлар байкалбай эле. Муну менен кимдир бирөөлөр элди дүрбөлөңгө түшүргүсү келип жатат деп ойлойм.
Өлкө жетекчилиги илдетти ооздуктоо үчүн болгон күчүн жумшоодо. Бейтаптарды дарылоо шарттарын жакшыртуу үчүн жаңы оорукана салып жатат. Аны рекорддук мөөнөт менен алты күндүн ичинде куруп бүткөрүү пландалганын уктук. Ачылышы 2-февралда өтүп, 1000 адамды кабыл алууга даяр болот экен.
Элге үмүт берген жагымдуу кабарлар акырындап чыга баштады. Кечээ Кытайдын Оорулардын алдын алуу жана көзөмөлдөө борбору коронавируска каршы вакцина ойлоп табуунун үстүндө иштеп жатканы айтылды.
