Дарыгерлер 4500 аялга сурамжылоо жүргүзгөн.
Аялдардын эмне себептен төшөк кумарына кызыкпай каларын жашы өтүп бара жаткан аялдардын ден соолугун изилдөө менен алектенген АКШдагы North American Menopause Society уюму аныктады. Бул тууралуу New York Daily News басылмасы жазды.
Суроого жооп алуу үчүн дарыгерлер 4500 аялга сурамжылоо жүргүзгөн. Алардын арасынан 22 пайызынын гана туруктуу интимдик жашоосу бар экени аныкталган. Ал эми үч пайызы төшөк кумарынан чындап ырахат алышарын билдиришкен.
"Аялдардын секстен баш тартышынын эң негизги себеби - туруктуу өнөктөштүн жоктугу экен. Мисалы, көпчүлүгү ажырашкан же жесир калгандар. Андыктан аял киши утурумдук эле бирөөгө "ачыла" бергиси келбейт", — деп айтылат макалада.
Аялдар мындан башка дагы себептерге таянат. Мисалы, 27 пайызы түгөйүнүн тулку боюна ичи жылыбайт. Тагыраагы, эркек өтө толук, курсагы чендейген же тескерисинче, колго урунаар эти жок арык болгон учурда. Ал эми 13,5 пайызы эркегинин бел күчүнө алымсынбайт.
Аялдардын калган 18 пайызы өзүнүн ден соолугуна байланыштуу же түгөйү менен урушуп кеткендиктен түндү "жалгыздыкта" өткөрөрүн билдиришкен.
Дарыгерлердин кошумчалаганына караганда, аял кишинин дене кумарынан баш тартышына өзүн кары сезгендиги жана тулку боюна ыраазы болбогондугу дагы себеп болот. Бирок сурамжылоого катышкан аялдар мындай жүйөлөрдү келтирген эмес.
