19 апреля 2019
Талкаланган камера баллистикалык экспертизага жөнөтүлдү.
Чүй облусуна караштуу Ысык-Ата районунун Гидростроитель айылындагы "Коопсуз шаардын" камерасы талкаланды.
Буга чейин Бишкек менен Чүйдө 15-апрелден тарта дагы 16 камера ишке берилери айтылган болчу.
"Окуя 15-апрелге караган түнү болгон. Эртең менен Бишкек — Торугарт трассасындагы Гидростроитель айылында орнотулган камера талкаланганы аныкталды. Алдын ала маалымат боюнча камераны тапанча менен атышкан", — дешти компаниядан.
"Вегадан" билдиришкендей, аталган факты боюнча Ысык-Ата РИИБине арыз жазылып, баллистикалык экспертиза дайындалды. Анын жыйынтыгы менен камерага ок чыгарылган-чыгарылбаганы белгилүү болот.
Камераны калыбына келтирүү мүмкүн эместиги айтылды.
