Олимпиада жана Паралимпиада оюндарынын жеңүүчүлөрү менен байге ээлерине каралган өмүр бою берилүүчү стипендиялардын өлчөмүн көбөйтүү тууралуу Токтомго былтыр өкмөт башчы Мухаммедкалый Абылгазиев кол койгон эле. Ал эми кечээ, 19-февралда президент Сооронбай Жээнбековдун жарлыгы менен эски стипендиялар биротоло жокко чыгарылды. Эски мыйзамга ылайык Олимпиада чемпиону 20 миң, вице-чемпиону 17 миң жана коло байгесинин ээси 15 миң алчу. Эми жаңы токтом боюнча Олимпиаданын жеңүүчүсү 30 миң, күмүш медалчысы 25 миң жана 3-орундун ээси 20 миң сом алмакчы.
Белгилүү болгондой, бүгүнкү күндө өмүрүнүн аягына чейин олимпиадалык стипендияларды Каныбек Осмоналиев (Москва-1980 Олимпиадасынын чемпиону) менен балбандар Канат Бегалиев жана Руслан Түмөнбаевдер гана алышат. К. Бегалиев Бээжин-2008 Олимпиадасында 2-орунду камсыздаса, Р. Түмөнбаев ошол эле мелдеште 3-орунга илинген.
