Президент шайлоочулардын тизмесин тактоо функциясын Мамлекеттик каттоо кызматы эмес, логикага ылайык, Борбордук шайлоо комиссиясы аткарышы керектигин белгиледи.
Келерки парламенттик шайлоолорго тиешелүү мыйзамдарды кечиктирбей, парламенттин жайкы каникулуна чейин кабыл алуу зарыл. Бул тууралуу президент Сооронбай Жээнбеков кыргыз парламентинин 80 жылдык мааракесине арналган илимий-практикалык конференцияга катышып жатып билдирди.
Өлкө башчы биометрикалык технологияларды колдонуу менен ар бир шайлоочунун добушу так эсептелип калганын белгиледи. Бирок ошол эле учурда шайлоо процессин толук бойдон кемчиликсиз өткөрүүгө мамлекет даяр деп айтууга болбойт.
"Мисалы, добушту сатып алуу, партиялык тизменин сапаты жана туруктуулугу, шайлоо фондусунун өлчөмү сыяктуу маселелерди чечиш керек. Шайлоочулардын тизмесин тактоо функциясын Мамлекеттик каттоо кызматы эмес, логикага ылайык, Борбордук шайлоо комиссиясы аткарышы керек. Ушул сыяктуу маселелерди мыйзам жолу менен тактап, бардык шайлоо эрежелерин мыйзам менен бекитип, партияларга, шайлоочуларга белгилүү кылуу зарыл", — деди Жээнбеков.
Президент шайлоо эрежелеринин баары теӊ шайлоого бир жыл калганга чейин аныкталып, партиялар алдын-ала белгилүү болгон мыйзам нормалары менен шайлоого барышы зарылдыгын белгиледи.
"Кыргызстанда саясий партиялар жөнүндөгү мыйзам эскирди. Азыр турмуш реалдуулугу башка. Бул мыйзамдын жаңы редакциясын иштеп чыгып, кабыл алуу муктаждыгы турат. Азыркы учурда шайлоолор жөнүндө мыйзамдарды өркүндөтүүнүн 2018-2020-жылдардагы стратегиясы бекитилди. Анын алкагында шайлоо жана саясий партиялар боюнча тиешелүү мыйзам долбоорлору иштелип чыгып, жумушчу топ тарабынан Жогорку Кеңешке сунушталган", — деди президент.
Ал ошондой эле сот-укуктук реформасынын алкагында ишке кирчү кодекстердин айрым беренелерин Конституцияга ылайык келтирүү боюнча мыйзам долбоорлорду кечиктирбей кароо зарылдыгын депутаттарга эскертти.
Дагы: sputnik.kg, фото-© Пресс-служба президента КР / Султан Досалиев
