Рулду туура кармап айдаш үчүн сааттын циферблатын элестетип алыш керек: колдор саат 2ни жана 10 цифраларын көрсөткөн жерде болгону дурус. Бул туурасында "Прайм" агенттигине "Авилон" деп аталган сатуу тобунун жетекчиси Павел Червяков айтып берген.
Тагыраагы, оң жана сол колдор рулдун орто жеринен бир аз өйдөрөөк жайгашышы туура болот.
Адис "ачык" жана "жабык" кармоо деген түшүнүктөр болорун айтып берди. Ачыгында кол рулда бошоң жайгашып, башкача айтканда, айдоочу таштап коюп, айдап кете берет. Ал эми жабыгында манжаларды жая, алкакты оролто кармап алышат. Бул өзгөчө өңгүл-дөңгүл, таштуу же тайгалак жолдо бараткандан кабар берет. Ар кыл маневрларды жасаганда рулду мыкчыбай бошоң кармаш керек, себеби ары-бери бурганда манжалар эркин болушу зарыл.
"Айдоочулардын ката кетирген учуру — рулду же өйдө жагынан, же ылдый жагынан эки кол менен бирдей кылып кармап алгандык. Чалкалап отуруп алып бир кол менен буруп, айлантуу да кеңири тараган кемчиликтердин бири", — деди Червяков.
Адис кээ бир учурда айдоочу эки колун тең рулдун алкагынын ичине салып алып бурган учурлар өтө кооптуу экенин айтты. Мындан сырткары, алкакты алакандын кыры же баш бармак менен сөөмөйдүн ортосуна киргизип алып да ары-бери бурган адаттан арылуу керектигин тыкыр эскерткен.
"Мындай учурлар өтө кооптуу. Шашылыш болуп калган учурда колду рулдан сууруп, көз ачып-жумгуча кырдаалга жараша реакция кылып жетишпей калышыңыз мүмкүн. Андан сырткары. манжаларга да кооптуулук жаралат", — деп эскерткен автоэксперт.
Жолдо кетип бара жатканда бир-эки секунд да мааниге ээ экендигин темир тулпар ээлеринин баарына эле маалым болсо керек.
Червяков рулду туура кармоо, тагыраагы, руль менен адамдын колунун туура келиши айдаган кишинин эрежеге ылайык отурганына байланыштуу экенин баса белгилейт.
Мисалы, бир топ кишилер автокөлүктү болушунча чалкалап (кээде аз эле эле жерден жатып албай) айдоону адат кылып алган. Кырсык каш-кабактын ортосунда, чукул кырдаал жаралып калган киши кадимки калыбына келип, оңдонуп отурганга жетишпей калуу коркунучу бар. Дагы бир адат — айдап бара жаткан адам рулга өтө эле өбөктөп алганы. Червяков бул да туура эместигин, ал автоунаанын оңго же солго бурганда кадимкидей тоскоолдук кылып, ыңгайсыз абалга кептей турганын эскерткен.
