Коронавирус жана башка вирустук инфекциялар күчөп жатканына байланыштуу Республикалык штаб кулак-мурун дарыгеринин (ЛОР) сунуштамалары менен бөлүштү.
Биринчиден, антибиотиктер менен дарыланбай, оорунун белгилерине жараша дары колдонуу керектиги эскертилди.
"Мисалы, мурун бүтсө туздун аралашмасы менен жууш керек. Тамакка сода аралашмасын, чөптөрдүн кайнатмаларын (календула, ромашка) колдонууга болот. Ал үчүн бир аш кашык чөпкө бир стакан кайнак суу куюп демдеп, 5-10 мүнөттөн кийин чыпкалап, жылуу аралашма менен күнүнө 3-4 жолу тамакты чайкап туруу керек. Кайнатмаларды алмак-салмак пайдаланбаш керек. Колдонор алдында чөптүн жарактуулук мезгилин сөзсүз караңыз. Ошондой эле фурацилин менен чайкоого болот", — деп жазылган сунуштамада.
Тамак кургап, кычышып, жуткурбай жатса ооруну басуучу таблеткаларды же спрейлерди колдонуу керек. Бирок сөзсүз түрдө дарыгердин кеңешин алыңыз.
"Омикрондо" муундар катуу ооруй турганы белгиленет. Интоксикация, тагыраагы, дененин ууланышы узакка созулат, кээде бул антибиотиктерди ичүүгө байланыштуу. Эгерде дене табы бир нече күн бою түшпөсө, абал начарласа, дароо дарыгерге кайрылып, туура дарылоону баштоо керек.
Ошондой эле суюктукту көп ичүү зарыл. Бир килограмм салмакка 30 миллилитр суу туура келет. Бирок ооруп жаткан тамакты жабыркатып албаш үчүн өтө ысык ичпеңиз.
Мындан сырткары, ооруганда жатпаш керек. Кыймыл аз кезде организм оору менен күрөшө албайт.
Коронавирусту, анын жаңы "омикрон" штаммын жана башка инфекцияларды алдын алуу үчүн маска тагынып, колду таза жууп, аралыкты сактап жана эмдөөдөн өтүү керектиги кошумчаланды.
