Кыргызгидромет аптанын дем алыш күндөрүнө карата аба ырайынын божомолун жарыялады. Билдирмеге караганда, жума этегинде көпчүлүк аймактарда жаан-чачын жаабайт, бирок абанын температурасы салыштырмалуу төмөн болот. Бишкекте кар жаабай турганы айтылды.
Чүй, Талас облустары
22-23-январда Чүй облусунда жаан-чачын болбойт. Абанын температурасы күндүз 1...6 градуска жетет. Таласта 23-январда күндүз кар жаашы ыктымал. Абанын температурасы -2…-4 градуска төмөндөй турганы божомолдонду.
Ош, Баткен, Жалал-Абад облустары
22-январь, ишембиде, жаан, кар жаабай турганы айтылды. 23-январда бир аз кар жаашы ыктымал. Абанын температурасы күндүз 2…4 градусту көрсөтсө, түнкүсүн -2 градуска чейин төмөндөшү мүмкүн.
Нарын, Ысык-Көл облустары
Ысык-Көлдө аптанын акыркы эки күнүндө кар жаабайт. Бирок жолдор тайгак, тоңголок болуп, кар күрткүсү күтүлөт. Абанын температурасы күндүз 0…-5 градусту көрсөтөт. Ал эми Нарында кар жаабайт, анткен менен сууктун күчү -9…-11 градуска жетери божомолдонду.
