Тажик маалымат каражаттары Тажикстандын аймактарынан медицина кызматкерлеринин массалык түрдө кетип жатканын жазышууда. Негизинен медицина кызматкерлери Россияга эмгек миграциясына кетип жатышат.
Эки жылдын ичинде Шахринавдан бир нече ондогон врачтар кетишти
Шахринав районунун бийлиги быйыл ондогон дарыгерлер менен медайымдар аймактагы ооруканаларды таштап, Орусияга көчүп кетишкенин кабарлады.
Шахринав аймактык ооруканасынын башкы дарыгери Гиесиддин Рахимовдун айтымында, былтыр жана быйылкы жылы эле Орусияга 13 дарыгер кеткен. Ошондой эле 32 медкызматкер жумуштан кетип, анын ону үй-бүлөсү менен Орусияга кеткен.
«Шахринав» баштапкы медициналык-санитардык жардам борборунун директору Толиб Ахмедовдун айтымында, быйылкы жылдын 10 айында хирург, уролог, үй-бүлөлүк дарыгерлер жана стоматологдордон турган жети таланттуу дарыгер Орусияга кеткен.
«Озоди» радиосу партиялык гезитке шилтеме жасап, дарыгерлердин жумуштан кетишинин жана миграциянын негизги себептери айлык акынын аздыгы, турак-жай шартынын жоктугу жана мамлекеттик органдардын негизсиз көп текшерүүлөрү деп жазат.
Орусияга миграцияга байланыштуу азыр бул аймакка үй-бүлөлүк дарыгерлер, стоматологдор, хирургдар, травматологдор, педиатрлар, акушеркалар жана башка медицина кызматкерлери керек.
Кубодиёндо 50дөн ашык медицина кызматкери жумуштан кетти
“Фараж” басылмасы Хатлон облусунун бир гана Кубодиён районунда БМСтин 51 медицина кызматкери жумуштан кеткенин кабарлады.
Аталган борбордун жетекчиси Каримжон Файзулозоданын айтымында, пенсиядагы медицина кызматкерлеринин 23ү Орусияга миграцияга кеткен, алардын бешөө квалификациялуу врачтар.
Буга чейин Хатлон облустук саламаттыкты сактоо башкармалыгы акыркы бир жарым жылда 83 Хатлондук дарыгер экономикалык кыйынчылыктардан жана турак жайдын жоктугунан улам өлкөдөн чыгып кеткенин маалымдап, саламаттыкты сактоо кызматкерлерин тынчсыздандырган.
Былтыр август айында Тажикстандын президенти медицина кызматкерлери менен жолугушууда жалпысынан бүгүнкү күндө өлкөдө 4264 дарыгер жана 2358 медайым жетишсиз экенин айткан.
Ал арада Россияга көчүрүү программасы боюнча негизинен дарыгерлер менен мугалимдер кетип жатышат. 2020-жылы Россия Федерациясынын Ички иштер министрлигинин маалыматы боюнча Тажикстандын 60 миңден ашуун жараны орус жарандыгын алган, бул 2019-жылдагы көрсөткүчтөн 20 миңге көп.
