Милиция жерине барып текшергенде каракчылар үйгө ашкананын терезеси аркылуу киргени белгилүү болгон.
Чүй облусунда бир канча каракчылык иштерге шектелген жарандар кармалды. Бул тууралуу облустук милициянын маалымат кызматы кабарлады.
Билдирүүгө ылайык, 5-ноябрда Лебединовка айылында кылмышкерлер эки кабаттуу жер тамда жашаган үй-бүлөнү карактоого киргени тууралуу маалымат түшкөн.
"Жабырлануучунун айтымында, үйдө беш адам болгон. Болжол менен таңкы саат 4:20да үй ээсинин баласы ажатканага чыгып баратып, кире бериштеги бир нече адамдын караанын көргөн. Ал дароо эле кийинки бөлмөдө жаткан атасын ойготууга аракет кылган. Ошол учурда кылмышкерлердин бири баланы көздөй эки жолу ок чыгарып, андан соң баары качып кетишкен", — деп айтылат маалыматта.
Милиция жерине барып текшергенде каракчылар үйгө ашкананын терезеси аркылуу киргени белгилүү болгон. Тергөө маалында "Коопсуз шаардын" камералары аркылуу кылмышкерлер жүргөн автоунаа аныкталган.
Окуядан бир нече күн өткөндөн кийин шектүү катары 24, 26, 47 жана 49 жаштагы төрт адам кармалган.
Окуядан бир нече күн өткөндөн кийин шектүү катары 24, 26, 47 жана 49 жаштагы төрт адам кармалган. Эң улуусунун машинасын тинткенде баңгизат табылган. Ал эми үйүнөн бет кап, кол кап жана башка буюмдар чыккан.
Эң улуусунун машинасын тинткенде баңгизат табылган. Ал эми үйүнөн бет кап, кол кап жана башка буюмдар чыккан.
47 жаштагы кишинин Пригородное айылындагы үйүнөн кайра жасалган Калашников автоматы, кичине калибрдеги винтовка, газ тапанчасы, револьвер, төрт бычак, үч бет кап, 60тан ашуун диний китеп жана баракча, жасалма чач жана башка буюмдар чыккан.
Чүй облустук милициясы кармалгандардын август айында болгон Лебединовкадагы каракчылыкка катыштыгы бар экенин билдирди. Анда таң эрте бир бүлөгө кол салып, үй ээсинин буту-колун скотч, хомут менен байлап салган. Аны коркутуп акча талап кылышкан. Андан соң короосунда турган Honda CR-V үлгүсүндөгү машинасын айдап кеткен. Автоунаа кийин Бишкектен табылган.
Алар мындан башка дагы Бишкек менен Жалал-Абад облусунда катталган эки карактоого тиешеси бар экени айтылат. Ошондой эле Бишкектен дагы үч уурулук жасаганы аныкталган.
Шектүүлөрдүн дагы башка кылмыштарга тиешеси бар-жогу текшерилип жатат.
