Монополияга каршы жөнгө салуу мамлекеттик агенттиги өкмөттүн токтомун аткаруу үчүн күн сайын мониторинг жүргүзүлө турганын эскертти.
БИШКЕК, 5-ноя. — Sputnik. Бишкек шаарынын Октябрь жана Свердлов райондорунда көмүрдүн бир тоннасын 4800 сомдон 5200 сомго чейин сатып жаткан жеке ишкерлер аныкталды. Бул тууралуу Монополияга каршы жөнгө салуу мамлекеттик агенттигинин маалымат кызматы кабарлады.
© ФОТО / ПРЕСС-СЛУЖБА ГОСАГЕНТСТВА АНТИМОНОПОЛЬНОГО РЕГУЛИРОВАНИЯ
Бишкек шаарынын Октябрь жана Свердлов райондорунда көмүрдүн бир тоннасын 4800 сомдон 5200 сомго чейин сатып жаткан жеке ишкерлер аныкталды
Билдирмеге караганда, өлкөдө көмүрдүн наркынын өсүү темпин кармап туруу боюнча өкмөттүн токтомун аткаруу максатында агенттиктин кызматкерлери Чүй менен Бишкек шаарындагы көмүр саткан жайларды кыдырып, мониторинг жүргүзүшкөн.
"Жыйынтыгында Бишкектин Октябрь жана Свердлов райондорунда көмүрдү 4800 сомдон 5200 сомго чейин сатып жаткан жеке ишкерлер аныкталды. Аларга административдик протокол түзүлүп, айып пул салынды. Ошондой эле бир ишкерге эскертүү берилди", — деп айтылат маалыматта.
Агенттик мындай иштер күндө уланарын жана мониторинг жүрүп турарын эскертти.
Буга чейин мамлекеттик агенттик көмүрдү кымбат саткандардын үстүнөн кайда арызданса болорун айтып, телефондорун жарыялаган.
