25-октябрда күйүүчү май рыногундагы баалардын өсүшүн талкуулоо үчүн жумушчу жыйын өттү. Ага рыноктун негизги ири оюнчулары катышты.
Монополияга каршы жөнгө салуу мамлекеттик агенттиги күйүүчү майга болгон баанын өсүшүн кармап туруу үчүн өз ыйгарым укуктарынын алкагында чара көрүп жатат. Бул тууралуу аталган агенттиктен билдирди.
Маалыматка караганда, 2021-жылдын январь-октябрь айларында бензин 70 пайызга, дизель майы 50 пайызга кымбаттаган. Буга Россиядагы мунайды кайра иштеткен заводдордогу дүң баанын жогорулашы себеп болууда.
Учурда Монополияга каршы жөнгө салуу мамлекеттик агенттиги бааны жөнгө салуу үчүн төмөнкүдөй чараларды көрүүдө:
Күйүүчү-майлоочу каражаттардын баасы боюнча сурамжылоо жүргүзүү;
Рыноктогу кырдаалга анализ жасоо;
Күйүүчү майды негизсиз кымбаттатпоого сунуштамаларды берүү.
"Нефтетрейдерлер тарабынан "Атаандаштык" жөнүндөгү мыйзам бузулган кезде антимонополдук орган тийиштүү чара көрөт", — деп айтылат маалыматта.
Мындан сырткары, 25-октябрда Монополияга каршы жөнгө салуу мамлекеттик агенттигинин директору Кеңешбай Тайлаковдун жетектөөсү менен күйүүчү май рыногундагы баалардын өсүшүн талкуулоо үчүн жумушчу жыйын өттү. Ага рыноктун негизги ири оюнчулары катышкан.
Жыйындын жыйынтыгы менен антимонополдук орган төмөнкү чечимдерди кабыл алган:
"Атаандаштык" жөнүндөгү Кыргызстандын мыйзамдарын так сактоо;
Күз-кыш мезгилин эске алуу менен баанын кескин өсүп кетишине жол бербөө (баа деңгээлин кармаган инструменттерди колдонуу жолу менен);
Күйүүчү майдын дефицити жаралбашы үчүн күйүүчү майды запастоо.
Эске салсак, буга чейин Нефтетрейдерлер ассоциациясы чара көрбөсө бензин дагы 9 сомго кымбаттай турганын эскерткен.
