Министрлер кабинетинин төрагасы телефон иш үчүн эмес, бирөөнү шыбаш үчүн эле керек болуп калдыбы деген ойго кептелип турганын айтты.
Элибиз 20 миллиард сомду ушакташууга коротуп жатат. Бул тууралуу министрлер кабинетинин төрагасы Акылбек Жапаров республикалык кеңешмеде билдирди.
Ал жергиликтүү бийлик органдарынын башчыларына кайрылып, инвентаризациялоо иштери башталганына үч жылдан ашканына карабай бүтпөй жатканына нааразы болду.
"Бир мисал келтирейин, Кыргызстанда 10дон ашуун уюлдук компания иштейт. Тамаша иретинде айтканда, жылына 20 миллиард сомду сүйлөшүүгө, ушакташууга коротуп жатабыз. Телефондун айынан пейлибиз бузулуп баратат, элден ырк да кетти. Телефон иш үчүн эмес, шыбаш үчүн эле керек болуп калдыбы деген ой келет. Бул да чындык болуп бараткандай. Биз эл пособиени азык-түлүк, кийим-кече алууга колдонуп жаткан-жатпаганын билишибиз керек. Эгер телефонго коротуп атса аны көтөрүүнүн кажети барбы же жокпу, карап көрүш керек", — деди Жапаров.
Ошондой эле ал жылына пособие үчүн бюджеттен 7,5 миллиард сом бөлүнөрүн айтты.
