Демилгечилердин бири чылым чегүүгө таптакыр тыюу салуу эмес, коомдук жайларда тамеки тартууну чектөө максаты болгонун белгиледи.
Өлкө башчы Садыр Жапаров коомдук жайлар менен мекемелерде тамеки тартууга тыюу салган мыйзам долбооруна кол койду. Бул тууралуу президенттин маалымат кызматы билдирди.
"Кыргызстандын жарандарынын ден соолугун тамеки, никотин кесепеттеринен, айланадагы тамеки түтүнүнүн жана аэрозолдун таасиринен коргоо жөнүндө" мыйзам Жогорку Кеңеш тарабынан 2021-жылдын 29-июлунда кабыл алынган.
Демилгечилер тыюу кафе жана ресторандарга тиешелүү экенин белгилешкен.
Документ өлкө калкынын саламаттыгын тамекини колдонуунун кесепеттеринен коргоо, ошондой эле Дүйнөлүк саламаттык сактоо уюмунун (ДССУ) Тамекиге каршы күрөшүү боюнча рамкалык конвенциясын ишке ашыруу максатын көздөйт.
Мыйзам тамеки каражаттарынын бардык түрлөрүн, никотинди жеткирүүнүн электрондук системаларын колдонууга көзөмөл жүргүзүү жана бардык тамеки каражаттарынын жарнамасына толук тыюу салуу аркылуу, тамекиге жана тамеки каражаттарынын бардык түрлөрүнө каршы күрөшүү боюнча нормаларды жакшыртууга жана чараларды күчөтүүгө багытталганы документте айтылат.
Буга чейин демилгечилердин бири, депутат Айнуру Алтыбаева долбоор биринчи окууда кабыл алынып, кийин ал толукталганын белгилеген. Мисалы, аялдамаларда жана аэропорттордо тамеки сатууга тыюу салынган.
"Бул мыйзам долбоору пандемияга чейин иштелип чыгып, биринчи окуудан өткөн. Пандемияны эске алып, биз ага өзгөртүү киргиздик. Кыскача айтканда, тамеки тартууга бардык эле жерлерде тыюу салынбайт. Бирок коомдук жайларда тамеки тартууга тыюу салууну сунуштап жатабыз. Чылым чеккен адам башкалардын эркин дем алуусуна тоскоол болбошу керек. Азыр тамеки чегүүгө уруксат берилген кафе-ресторандарда студенттер окуусунун контрагына акча чогултуп иштешет", — деген Алтыбаева.
Мурдагы мыйзамга ылайык, ар бир мекемеде тамеки тартууга ылайыкташкан атайын жай болушу зарыл. Бирок жаңы мыйзамдын демилгечилери мындай учурда тейлөөчү кызматкерлер түтүн менен дем алып каларын белгилешет. Документтин авторлору Кыргызстанда өлүмдүн жана майыптыктын негизги себеби тамеки тартуу экенин буга чейин белгилешкен.
