4-8 пайыз менен. Сентябрдан тарта ишке аша турган мамлекеттик ипотеканын шарты

"Менин үйүм — 2021-2026" программасын ишке ашыруу 16-сентябрда башталат. Бул тууралуу "Мамлекеттик ипотекалык компания" мекемеси билдирди.

Мамлекеттик ипотекалык насыялар эки багытта берилип, ар биринде экиден продукт камтылган.

Бюджеттик сектордун кызматкерлери үчүн "жеңилдетилген ипотека" каралган.

"Даяр турак жайды сатып алуу" продуктусу:

• пайыздык чен — жылдык үстөк 4 пайыз. Мурда 6-8 пайыз болчу;
• баштапкы төлөм — 10 пайыздан (баштапкы төлөм жок болгон учурда кошумча күрөө камсыздалышы мүмкүн);
• насыянын мөөнөтү — 15 жылдан 25 жылга чейин (кардардын төлөй ала турганына жараша). Буга чейин эң көп 15 жыл болчу;
• ипотекалык насыянын максималдуу суммасы — 4 миллион сомго чейин. Буга чейин 3 миллион болчу;

"Жеке турак жай куруу" продуктусу:

• курулуш мезгили үчүн жылдык 8 пайыздык жана курулуш аяктагандан кийин жылдык 4 пайыздык чен. Мурда 6-10 пайыз эле;
• баштапкы төлөм — 20 пайыздан жогору;
• насыянын мөөнөтү — 15 жылдан 25 жылга чейин (кардардын төлөй ала турганына жараша). Буга чейин 15 жыл болчу;
• ипотекалык насыянын максималдуу суммасы — 4 миллион сомго чейин. Мурда 3 миллион болчу;
• "Жеткиликтүү ипотека" жарандардын бардык категориялары үчүн Бишкек жана Ош шаарларында каралган (аймактарда берилип жатат).

"Даяр турак жайды сатып алуу" продуктусу:

• пайыздык чен жылдык — 8 пайыз. Ага чейин 14 пайыз эле;
• 20 пайыз өлчөмүндөгү баштапкы төлөм (баштапкы төлөм жок болсо кошумча күрөө камсыздалышы мүмкүн);
• Насыянын мөөнөтү 15 жылдан 25 жылга чейин (кардардын төлөө мүмкүндүгүнө жараша). Буга чейин 15 жыл болчу;
• ипотекалык насыянын максималдуу суммасы 5 миллион сомго чейин. Мурда 3 миллион сомго чейин болгону белгилүү.

"Жеке турак жай курулушу" продуктусу:

• курулуш мезгили үчүн жылдык 12 пайыздан жана курулуш аяктагандан кийин жылдык 8 пайыздык чен;
• 20 пайыздан тарта баштапкы төлөм;
• насыянын мөөнөтү 15 жылдан 25 жылга чейин (кардардын төлөй ала турганына жараша);
• ипотекалык насыянын максималдуу суммасы 5 миллион сомго чейин.

Эки багыт боюнча сатып алынган турак жайларга болгон талаптар:

• көп кабаттуу үйдөгү батирлер үчүн — жалпы аянты 80 чарчы метрден ашпоого тийиш;
• жеке турак жай имараттары үчүн — жалпы аянты 150 чарчы метрден ашпоого тийиш;
• турак жайдын бир чарчы метринин баасы 60 000 сомдон ашпашы керек.

sputnik