Тышкы иштер министри Руслан Казакбаев россиялык кесиптеши Сергей Лавров менен Бишкектеги соода борбордо болгон чуулуу окуя боюнча пикир алмашты. Бул тууралуу Кыргызстандын ТИМи билдирди.
Буга чейин Россиянын ТИМи эки тарап бул маселени телефон аркылуу сүйлөшүп жатканда талкуулаганын кабарлаган.
Казакбаев Россия тарапка факты боюнча Кылмыш-жаза кодексинин 266-беренеси ("Бейбаштык") боюнча сотко чейинки өндүрүш башталып, кызга кол көтөргөн жаран камакка алынганын билдирген. Ошондой эле кыргыз тарап улутчулдуктун бардык түрүн айыптай турганын белгилеген.
Министр мындай окуя Кыргызстанда, Россияда дегеле кайда болбосун, ким тарабынан жасалбасын тийиштүү баа берилип, чара көрүлүшү зарылдыгын белгилеген.
"Казакбаев Госдуманын айрым депутаттары бул окуяга байланыштуу мындай кадамга барган жарандарды Россияга киргизбөө сунушун көтөрүп чыкканы өкүнүчтүү экенин билдирди. Министр ошондой эле кээ бир россиялык саясатчылардын мындай билдирүүлөрү эки өлкөнүн жарандарынын кирип-чыгышына таасир этпеши керектигин кошумчалаган", — деп айтылат маалыматта.
Мындан сырткары, Кыргызстандын ТИМ жетекчиси ушундай эле окуялар Россияда дагы болуп жатканына көңүл буруп, өтө сейрек кездешкен мындай көрүнүштү Россия бийлиги Кыргызстандагы этникалык орустардын укугу системалык түрдө бузулуп жаткандай кабылдабашы керектигин белгилеген.
Казакбаев Кыргызстанда русофобия жана улутчулдуктун башка формалары жоктугун, тарых өзгөртүлүп жазылып жатпаганын, эстеликтер кулатылып орус тилине каршы чыгуу жоктугун кошумчалаган. Министр орус тили Кыргызстанда расмий тил макамына ээ болгондуктан бардык сферада колдонуларын айткан.
ТИМ башчысы мындан ары дагы эки өлкө ортосундагы достук кызматташтыгын бекемдөө үчүн конструктивдүү өз ара аракеттенүүгө даярдыгын кошумчалаган.
Тараптар сүйлөшүү учурунда кыргыз-орус мамилелеринин күн тартиби боюнча актуалдуу маселелерди талкуулап, Афганистандагы кырдаалдын курчуп кетишине байланыштуу эл аралык жана аймактык көйгөйлөр боюнча пикир алмашкан.
Эске салсак, 2-августта бейтааныш эркек киши мас болуп алып, Бишкектеги соода борборунун биринде кассир болуп иштеген кыз менен урушуп, сөгүнгөн. Чатакташып жатканда калькулятор менен башка чапкан. Ал андан кыргыз тилинде сүйлөөнү талап кылганы айтылган.
Аталган факт алгач Кылмыш жана жоруктардын бирдиктүү реестрине Жоруктар кодексинин 119-беренеси ("Майда бейбаштык") менен каттоого алынган. Бирок кийин иш кайра 266-беренеге ("Бейбаштык") өзгөртүлгөн.
13-август күнү бул жаран шаардык милициянын убактылуу кармоочу жайына киргизилген. Андан соң анын Октябрь райондук соту бөгөт чарасын карап, Бишкек шаарындагы №1 тергөө абагына бир айга камоо чечимин чыгарды.
