"Кумтөр" долбоору боюнча кылмыш ишинин 1992-2009-жылдардагы эпизоддору жыйынтыктоо этабына жетип калды. Бул тууралуу УКМКдан кабарлашты.
Маалыматка караганда, чогултулган далилдерден улам "Камеко" жана Centerra Gold Inc. кызматташуу учурундагы ири коррупция Кыргызстандын кызыкчылыктарына каршы аракет болгон деген бүтүм чыгарылды.
1992-жылы Башкы келишимди түзүүдө жана 1994-жылы ага өзгөртүүлөрдү киргизүү учурунда коррупция фактысы боюнча экс-президент Аскар Акаев жоопко тартылып, экс-премьер-министрлер Турсунбек Чыңгышев, Апас Жумагулов жана "Кыргыз алтын" мамлекеттик концернинин мурдагы президенти Дастан Сарыгулов, Экономикалык кайра куруу жана өнүктүрүү комитетинин экс-төрагасы Борис Бирштейн издөөдө жүргөн.
"2003-жылы "Комеко" компаниясы менен түзүлгөн Башкы келишимди реструктуризациялоо учурунда коррупция үчүн мурдагы президент Аскар Акаев дагы кылмыш жоопкерчилигине тартылган. Ошентип бул реструктуризациялоонун натыйжасында Centerra Gold Inc. Кыргызстандын үлүшүн 33,33 пайыз деп баалаган. Тергөө ошондой эле 2009-жылы "Кумтөр" долбоорунун жаңы шарттары жөнүндө келишим түзүүдө коррупциялык фактыга юридикалык баа берилип, 1992, 1994 жана 2003-жылдары түзүлгөн келишимдердин экономикага жана экологияга терс жактары аныкталган", — деп айтылат билдирүүдө.
Маалыматка караганда, бул эпизод боюнча кылмышка шектүү катары экс-премьер-министр Игорь Чудиновго, "Кыргыз алтын" ишканасынын мурдагы төрагасы Алмазбек Жакыповго, Мамлекеттик геология агенттигинин мурдагы директору Капар Курманалиев, директорлор кеңешинин төрагасы Алексей Елисеев, инвестордун өкүлү Андрей Сазанов, экс-президент Курманбек Бакиев жана анын уулу Максим Бакиевге издөө жарыяланган.
"2012-2014-жылдар аралыгында "Центерра" компаниясынын кызыкчылыгында кылмыштуу аракеттерди жасоо боюнча экс-премьер-министр Өмүрбек Бабанов, биринчи вице-премьер-министр Тайыр Сарпашев, депутаттар Асылбек Жээнбеков, Талант Узакбаев, Алмазбек Баатырбеков, Исхак Пирматов, президенттин Жогорку Кеңештеги мурдагы өкүлдөрү Данияр Нарынбаев жана Динара Молдошева жоопко тартылган", — деп айтылат билдирүүдө.
Тергөөдө аныкталган коррупциялык фактыларды жана канадалык инвесторлор менен Кыргызстандын кызыкчылыгына жооп бербеген келишимдердин шарттарын эске алуу менен "Кумтөр" долбоору боюнча келишимдерди денонсациялоо процесси башталды.
Ошондой эле Суу кодексине өзгөртүүлөрдү киргизүү боюнча тергөө улантылып жаткандыктан айыпталуучуларга юридикалык баа берилери кошумчаланды.
