Кыргызстандык оор салмактагы белгилүү мушкер Тилек Жээнбеков жаракат алганына байланыштуу OPEN FC турниринде беттешке чыкпай калды. Бул тууралуу спортчу Instagram баракчасы аркылуу билдирди.
Эске салсак, Жээнбеков көп жылдык тыныгуудан кийин OPEN FC лигасынын алкагында 14-августта мелдешке чыкмак. Турнир Бишкектеги Дөлөн Өмүрзаков атындагы борбордук стадиондо өтмөк. Атаандашы "самаралык бульдозер" каймана аты бар россиялык Олег Кубанов болчу.
"Урматтуу катталуучулар жана спорт сүйүүчүлөрү! Тилекке каршы, жагымсыз жаңылык айтайын. Белимен олуттуу жаракат алганыма байланыштуу беттештен баш тартууга аргасызмын. Туура түшүнөсүңөр деп ойлойм. Ушунча көп убакыт машыгып чыкпай калганым өкүнүчтүү. Жакшы болгондо кайтып келем", — деди Жээнбеков.
Ошондой эле мушкер турнирдин уюштуруучуларына жана менеджерлерге ыраазычылык билдирген. Сүрөттөрдөн белинин рентгенин көрүүгө болот.
Бул кыргызстандык атлеттин ММА спортундагы дээрлик төрт жылдык тыныгуудан кийинки алгачкы беттеши болмок. Акыркы жолу ал 2018-жылы кореялык Жун Су Лима менен кармашып утуп алган.
