Биз балдарды коргоо менен гана чектелбестен, алардын укугу жана кызыкчылыктары жүзөгө ашуусу үчүн бардык шарттарды түзүшүбүз керек. Бул тууралуу президент Садыр Жапаров Балдарды коргоонун эл аралык күнү менен куттуктоосунда айтты.
Өлкө башчынын маалымат кызматы куттуктоонун текстин жөнөттү.
"Бул күн жаш муунга кам көрүү милдетин чоңдордун эсине салып турат. Балдар — биздин байлыгыбыз, ошондуктан биз, чоңдор, ар бир баланын мээримди, боорукердикти сезип чоңоюшу үчүн болгон күч-аракетибизди жумшашыбыз керек. Жаш муунга ар тараптуу кам көрүү, үй-бүлө институтун чыңдоо, үй-бүлөлүк баалуулуктарды өркүндөтүү бизден туруктуулукту, акылмандыкты, сезимталдуулукту жана чыдамкайлыкты талап кылат", — деп айтылат текстте.
Ошондой эле президент балдарды коргоо менен гана чектелбестен, алардын укуктары жана кызыкчылыктары ишке ашуусу үчүн шарттарды түзүү керектигин эске салды.
"Бул мүдөөлөр — мамлекеттик масштабдагы милдеттер, алар ата-энелердин жана жакындарынын гана эмес, бийликтин да аракетин талап кылат. Мен балдарды жек көрүүчүлүктүн заарынан жана жамандыктан коргоого үндөп кетер элем. Баланын ар тараптуу өнүгүүсүнө талыкпай жардам берүү үчүн, эң башкысы, анын коопсуздугу менен ден соолугу жөнүндө кам көрүп, интеллектуалдык жана руханий өнүгүүсүнө шарт түзүү зарыл. Кантсе да өлкөбүздүн келечеги жаш мекендештерибиздин канчалык деңгээлде корголгону жана өсүп-өнүгүшү менен байланыштуу", — деди Жапаров.
Сөзүнүн аягында ал балдарга көңүлдүү эс алуу, жакшы таасирлерди, жаркын идеялардын ишке ашышын жана тилектеринин орундалышын каалады.
Балдарды коргоо күнү дүйнө жүзү боюнча 1950-жылдан бери белгиленип келет. Бул күн келечек муундун укуктарын коргоп, өмүрүнө жана ден соолугуна кам көрүү керектигин эске салып турат.
