Кыргызстанда 2021-жылдын аягында инфляциянын өсүү темпи жайлап калары күтүлүүдө. Бул тууралуу Евразия өнүктүрүү банкынын (ЕАӨБ) мамлекеттер аралык анализ борборунун улук аналитиги Айгүл Бердигулова билдирди.
Адистер Евразия өнүктүрүү банкынын "2021-жыл ЕАӨБге катышкан мамлекеттердин экономикасынын өсүшүн калыбына келтирүү мезгили болот" деген темадагы докладын тааныштырды.
"Кыргызстанда инфляция үстүбүздөгү жылдын декабрь айына барып жайлап, 7,3 пайызды түзөрүн божомолдоп жатабыз. Анда сомдун куну түшүп кеткени таасир этпей калат. Ички рыноктогу баанын өсүшү азык-түлүктүн регионалдык жана дүйнөлүк баасынан көз каранды болуп калат. Ошондой эле түшүм жыйноо мезгили башталганда да баалар төмөндөшүн болжоп жатабыз", — деди ал.
Аналитиктер тамак-ашка болгон дүйнөлүк баанын жана улуттук валютанын туруктуу болушу, керектөөчүлөрдүн суроо-талабы бир калыпта сакталышы инфляцияны кармап туруунун факторлору экенин айтат.
Быйыл Кыргызстандын экономикасы 3,9 пайызга өсөрү күтүлүүдө. Бирок экономиканы калыбына келтирүү үчүн айрым өнөктөш мамлекеттерге салыштырмалуу көп убакыт кетери болжолдонду.
