Телефон алдамчыларынын тобу бир нече миллиондук кылмыш жасашкан. Бул тууралуу ИИМден билдиришти. Азырынча 2,8 миллион сомдук кылмыш боюнча фактылар бар экени айтылды. ИИМ айрым схемаларды аныктаган.
"Товарын сатууга же сатып алууга аракет жасаган ишкерлер ири интернет-дүкөндөргө жарыя берип келишет. Мында реалдуу сатуучу менен сатып алуучунун ортосуна алдамчылар түшө калып пайдалуу сунуш бере салышат. Ишкерлер көбүнчө кылмышкерлердин нагыз максатын байкабай калышат. Алдамчылар телефон аркылуу сүйлөшүүдө сатуучулар менен сатып алуучуларды электрондук капчыкка акча котортууга аракет жасашат. Максаты ишке ашкандан кийин жоголуп кетишет. Кээ бирлер акча алуу үчүн курьерди дагы жөнөтүп жиберишет", - деп айтылат маалыматта.
Биринчи факт. Февралдын ортосунда телефон алдамчылары 30 тонна кумшекер жеткирип берүүнү сунуштап, ишкерди 1,6 миллион сомго алдап кетишкен. Экинчи бизнесменге дагы кумшекер жеткирип берүүнү убадалап 1,2 миллион сомго отургузушкан. Эки учурда тең сүйлөшүүлөрдөн кийин фирманын курьеримин деген адамдар келип акчасын алышкан.
ИИМден билдиришкендей, ишкерлер жабыркаган мындан башка дагы фактылар бар. Кылмышка шектелип үч адам кармалган. Мындай топту уюштурууга 41 жаштагы Ю.З. шектелип жатат. Ал алдамчылык фактысы боюнча камакта экени аныкталган. Алдын ала маалыматтар боюнча, аталган жаран ушундай эле башка кылмыштарга дагы тийиштиги бар.
"Ушул киши сатуучу жана сатып алуучулар менен телефон аркылуу сүйлөшүп турган. Анын айынан бизнесмендер ири суммадагы акчасын жоготушту", - дешти ИИМден.
Кылмышка шектелип 28 жана 22 жаштагы "курьерлер" дагы кармалган. Алардын үйүн тинтүү учурунда мобилдик аппараттар, SIM-карталар, кастеттер, бычактар, алтын браслет, металлдан жасалган союл, портмоне, айдоочулук күбөлүк жана башка адамдардын атына катталган банктык карталар табылган.
Тергөөнүн маалыматына караганда, миллиондогон суммалар камактагы Ю. З. аттуу жарандын электрондук капчыктарына которулуп турган. Ал эми "курьерлерге" аз эле каражат төлөнүп келген.
