Даяр протоколду бекитип, колдонууга буйрук чыгарууга Саламаттык сактоо министрлиги 1,5 ай убакыт короткон.
Эл көп каза болгон былтыркы июль айындагы дарылардын жетишсиз болушуна коронавирустан дарылоо боюнча протоколдун 1,5 ай бою колдонууга чыкпаганы себеп болгон. Бул туурасында Пандемиянын кесепеттерин иликтеген ведомстволук комиссиянын мүчөсү Айдай Турсунбекова билдирди.
Анын айтымында, клиникалык протоколдун үчүнчү версиясы май айынын башында даяр болгон, бирок аны Саламаттык сактоо министрлиги 18-июнда гана бекиткен.
"Анысы аз келгенсип ушул протокол менен дарылоо тууралуу буйрук дагы эки аптадан кийин чыккан. Ошентип керектүү дарылардын тизмеси фармацевдик компанияларга 1-июлда берилген. Башкача айтканда, даяр протоколду бекитип, колдонууга буйрук чыгарууга Саламаттык сактоо министрлигинин 1,5 ай убактысы кеткен. Мунун арты менен адам өмүрүнө маанилүү делген антикоагулянттар жана башка дары-дармектер убагында келбей калган", — деди Турсунбекова.
Ошондой эле ал медиктерди коронавирустан дарылоо боюнча башында окутпаганын, болгону коргооочу кийимдерди кантип кийип-чечүү керектигин гана үйрөткөнүн кошумчалады.
Айдай Турсунбекова комиссияга пандемияда каза болгондордун жакындарынын атынан кирген. Ал Жогорку Кеңештин депутаты Чыныбай Турсунбековдун кызы.
