Журналисттер Райым Матраимовдун мамлекетке 2 миллиард сом чыгым келтиргени кантип аныкталганына кызыгышты.
Бажы кызматынын төрагасынын мурдагы орун басары Райым Матраимов башка кызматкерлердин жардамы менен кыргыз-кытай чек арасынан өткөн ар бир автоунаадан 500 доллардан 3 миң долларга чейин акча алып турган. Бул тууралуу маалымат жыйын учурунда УКМКнын төрагасы Камчыбек Ташиев билдирди.
Журналисттер ага Райым Матраимовдун мамлекетке 2 миллиард доллар чыгым келтиргенин кантип аныктадыңар деген суроо берди.
"Бул сумманы тергөө аныктады, майда-чүйдөсүн айтып бере албайм. Бир эле эпизодун айта кетейин, Кытай менен Кыргызстандын чек арасынан өткөн ар бир автоунаадан 500 доллардан 3 миң долларга чейин акча алып турган. Ал иштеген учурда канча машина өтүшү мүмкүн экенин эсептеп чыгып, аны дагы коштук", — деди Ташиев.
Ошондой эле ал Матраимовго бул ишке жардам берген кишилерден 53 миллион сом өндүрүлгөнүн билдирди.
Буга чейин УКМК төрагасы Райым Матраимов убада кылган 2 миллиард сомду толугу менен төлөп бүткөнүн айткан.
