Жогорку Кеңештин маалымат кызматынын жетекчиси Ибраим Нуракун уулу премьер-министрди шайлоо үчүн өткөн кезексиз жыйынга катышкан депутаттардын тизмесин жарыялады.
Андагы маалыматка ылайык, 54 депутат келип каттоодон өткөн.
"ЖКнын 10-октябрдагы кезексиз жыйынына келген жана ишеним кат берген депутаттардын тизмеси. Аппараттын кызматкерлери каттаган. Сиздердин талап боюнча жарыялоого туура келип жатат", — деп жазган Нуракун уулу.
10 депутат кесиптештерине ишеним кат берип жибергени айтылды. Тизме төмөнкүдөй:
Ишеним кат менен катышкандар
- Алиярбек Абжалиев добуш берүү укугун кат түрүндө Талант Мамытовго берген;
- Салайдин Айдаров добуш берүү укугун кат түрүндө Дастан Жумабековго берген;
- Кубанычбек Жумалиев добуш берүү укугун кат түрүндө Улугбек Ормоновго берген;
- Ильхом Маннанов добуш берүү укугун кат түрүндө Жылдыз Мусабековага берген;
- Искендер Матраимов добуш берүү укугун кат түрүндө Жылдыз Мусабековага берген;
- Иса Өмүркулов добуш берүү укугу Сайдулла Нышановго берилген, ишеним кат нотариустан катталган;
- Абдыкапар Султанов добуш берүү укугун кат түрүндө Бакыт Төрөбаевге берген;
- Улан Примов добуш берүү укугун кат түрүндө Аида Касымалиевага берген;
- Азизбек Турсунбаев добуш берүү укугун кат түрүндө Алмазбек Токторовго берген;
- Максатбек Эгембердиев добуш берүү укугун кат түрүндө Өмүрбек Бакировго берген.
Эске салсак, 10-октябрда, мамлекеттик резиденцияда ЖК депутаттары кезексиз жыйынга чогулуп, жаңы өкмөттү шайлашкан. Башында төрага Мыктыбек Абдылдаев залда 51 депутат отурганын, 10у ишеним кат жибергенин жарыялаган. Залда отурган депутаттар дагы бир-экөө жолдо келе жатканын айткан.
Кийинчерээк вице-спикер Аида Касымалиева жыйын ортолоп калган чыгып кеткен. Ал эми Каныбек Иманалиев жыйынга 41 гана депутат катышканын, анын экөө толук катышпай кетип калганын билдирген. Мындан улам айрым депутаттар Садыр Жапаровду премьер-министрликке шайлаган жыйында кворум болбогонун айтышууда.
