Кыргызстанда коронавирус жана анын өтүшүп кеткен формасы - пневмонияга кабылып ооруканага жаткырылган бейтаптар акысыз дарыланат. Дарылары да бекер берилиши керек. Бул тууралуу Sputnik Кыргызстан агенттигине Милдеттүү медициналык камсыздандыруу (ММК) фондунун төрагасынын орун басары Акылбек Калыков маалымдады.
Анын айтымында, бул күндүзгү жана түнкү стационарларга кайрылгандарга тиешелүү эмес.
"Коронавирус менен пневмония чогуу эсептеле баштады. Кечээки брифингде элге эскертип, пневмония деле коронавирус сыяктуу бекер дарыланат деп айткам. Бул илдетке кабылгандарды ага чейин деле акысыз дарылап жатышкан. Болгону элге аны эскерттик. Бейтап кокус ооруканага коронавирустан жабыркап түшсө, бир да сом төлөбөйт. Бардыгын мамлекет өз мойнуна алган", — деди Калыков.
Аткаминер кычкылтек концентратору жана дары-дармек маселесине да токтолду.
"15-20 күн мурда аябай көп адам ооруканага кайрылып, кычкылтек концентраторлору чындап эле жетишсиз болуп жаткан. Бирок азыркы күндө бул маселе бир аз чечилип калды. Ооруканаларда болушунча кычкылтек концентраторлору бар. Бирок айрым медициналык мекемелерде жетишсиз болуп, тартыштык жаралышы ыктымал. Ошол себептен алар мүмкүнчүлүгү барлар болсо алып келгиле деп жатат. Эч кимди кыйнаган жок. Мындан сырткары, ооруканаларга түшкөн бейтаптардын дары-дармеги да акысыз. Болгону айрым учурда ооруканадан гепарин же клексан сыяктуу тартыш дарылар жок болуп калганда сурашат. Кокус дарыгерлер акы сурап же дагы башка мыйзам бузуулар катталса, адамдар министрлик же биздин фондго кайрылса болот", — деди Калыков.
Ал кечээки брифингде күндүзгү стационарларда пневмонияны дарылап иштеп жаткан дарыгерлерге дагы кошумча маяна төлөнө турганын айткан.
