SARS-CoV-2 коронавирусу Уханда пайда болгонго чейин эле жашап келген. "Уктап жаткан" абалынан аны табигый факторлордун топтому ойготушу ыктымал. Бул тууралуу Оксфорддун далилдөө медицина борборунун илимий кызматкери Том Жефферсон билдиргенин РИА Новости жазды.
Билдирмеге ылайык, окумуштуу дүйнөдөгү бардык маалыматтарга таянып, вирус ар кайсы өлкөдө бир нече убакыттан бери жашап жүргөнүн айткан. Буга чейин, 2019-жылы мартта, коронавирус Барселонадагы жамгыр, аба сууларынын үлгүсүнөн табылган. Ушул жылдын декабрь айында Турин менен Миланда жаандын сууларынан алынган үлгүнүн анализдеринин жыйынтыгы да оң болуп чыккан.
"Менин оюмча, вирус бардык эле жерде бар болчу. Азыр биз буга чейин уктап, кийин айлана-чөйрөнүн шартында активдешкен вирус менен күрөшүп жатышыбыз толук мүмкүн", — деген окумуштуу.
Жефферсон өткөн кылымдагы "испанка" пандемиясын мисал келтирген. Ага ылайык, 1918-жылдан 1920-жылга чейин сасык тумоонун бул түрүнөн 100 миллионго чукул адам каза болуп, аны Жер жүзүндөгү ар бир үчүнчү тургун жугузуп алган. Окумуштуу Батыш Самоада "испанка" оорусунан калктын 30 пайызы каза болгонун айтып, алар сырткы дүйнө менен байланышта болбогонун баса белгилеген.
Адистин ою боюнча, вирус козгогучтар эч кайдан келбейт жана эч жакка кетпейт.
"Алар дайыма ушул жерде. Вирусту айрым учурда бир нерсе козгойт. Бул адамдардын көптүгү же айлана-чөйрөнүн шарты да болушу мүмкүн. Биз дал ушул нерсени иликтешибиз керек", — деген ал.
Ал вирус адамдар арасында аба аркылуу эле эмес, жаан суулары аркылуу да жугушу мүмкүн экенин боолгологон.
