Премьер-министрдин тапшырмасы менен борбор калаадагы кесиптештерине жардам берүү үчүн аймактардагы ыктыярдуу дарыгерлер Бишкек шаарына жиберилет. Бул тууралуу Республикалык штабдын жыйынында белгилүү болду.
Өкмөттүн маалымат кызматы тараткан билдирүүдө, жыйында COVID-19га чалдыккандар үчүн ооруканалардагы орундарды көбөйтүү иштерин күнүгө жүргүзүү чечими кабыл алынганы айтылган. Мындан тышкары, калк арасында терс маанай жараткан жана дүрбөлөң түшүргөн такталбаган маалыматтар өтө ыкчам тарап жатканы тууралуу кеп болду.
COVID: Республикалык штабдын башчысы Баатырбеков обочолонду
"Ооба, белгилүү бир кыйынчылыктар бар. Алсак, бейтаптар үчүн орундар толуп калууда. Ооруканалардагы кезектер коркуу сезимин пайда кылып жатат. Кырдаалды жөнгө салуу үчүн биз жана дарыгерлер бардык күч-аракетибизди жумшап жатабыз", — деди өкмөт башчы.
Боронов бүгүнкү күнү И.Ахунбаев атындагы Кыргыз медициналык академиясынын, И.Арабаев атындагы Кыргыз мамлекеттик университетинин жана Д.Асанов атындагы Кыргыз улуттук аскер лицейинин жатаканаларында 500дөн ашуун орун бар экенин айтты.
"Бүгүнкү күндө көптөгөн дарыканалар суроо-талап жогору дары каражаттарынын баасын кескин көтөрүп жиберди. Буга жол берилбеши керек. Бааны негизсиз көтөргөндөрдүн баары мыйзам чегинде жоопко тартылат. Азыр адамдардын башына түшкөн кыйынчылыктан пайда издебей, жардам бере турган учур", — деди премьер-министр.
Жайында борбор калаадагы кесиптештерине жардам берүү үчүн аймактардагы ыктыярдуу дарыгерлер Бишкек шаарына жибериле турганы да белгиленди.
"Медицина кызматкерлеринин эмгеги алтынга тете. Азыр алар Бишкекте жетишсиз. Көпчүлүк медицина кызматкерлери башкалардын өмүрүн сактайм деп жатып вирусту жугузуп алышты. Биз, албетте, мажбурлай албайбыз, эгерде өз ыктыяры менен көмөктөшөм десе, бизге чоң жардам болот. Ошол эле учурда дарыгерлерге июнь айына берилүүчү бардык кошумча төлөмдөр 10-июлдан кечиктирилбестен төлөнүшү керектигин эскертем. Мындан тышкары, кошумча төлөмдүн көлөмүн көбөйтүү маселесин карап чыгуу керек", — деди Боронов.
Пульмонолог Сооронбаев: 30 жыл иштеп мындай пневмонияны көргөн эмесмин
Жыйындын жүрүшүндө кыргызстандык жарандарды Соль-Илецк (Россия Федерациясы) шаарынан алып келүү маселеси каралды. Жакынкы күндөрү алар мекенине кайтарылат.
Өкмөт башчы лабораториялар үчүн керектелүүчү материалдарды сатып алуу процессин тездетүүнү тапшырды. Мындан тышкары, облустардын жетекчилери өздөрүнө бекитилген аймактарда Бишкек шаарынын мисалында көзөмөлдү күчөтүүгө тийиш экени белгиленди.
