Бүгүн Биринчи май райондук сотунда Батукаевдин иши боюнча сот болуп, мурдагы президент Алмазбек Атамбаев 11 жыл 2 айга эркинен ажыратылды.
Мындай өкүмдү судья Эмилбек Каипов бүгүн, 19-июнда, чыгарды.
Судья Эмилбек Каипов
Бирок сот залында Атамбаевдин өзү болгон жок. Буга чейин мамлекеттик айыптоочу Атамбаевди 11 жыл 2 айга эркинен ажыратуу жана үй мүлкүн конфискациялап, андан сырткары мамлекеттик бардык наамдарын, сыйлыктарын артка чакыртып алууну сураган. Сот прокурор сунуштаган жазаны канааттандырды.
Жараянга мурдагы президент өзү катышкан жок. Буга чейинки процессте сот Атамбаевди тартипти бузгандыгы үчүн залдан чыгарылганы кабарланган. Мындан сырткары экс-президент бир нече ирет сот жараяндарына катышуудан баш тартып, залдан чыгып кеткен.
Батукаевдин иши
Кримтөбөл атыккан Азиз Батукаев 18 жылга эркинен ажыратылып Нарындын №24 абагында отурган. Бирок 2013-жылы оор дартка кабылганына байланыштуу бошотулуп, Грозныйга учуп кеткен.
2014-жылдын 20-майында КР Жаза аткаруу мамлекеттик кызматы Батукаевге эл аралык издөө жарыялаган. ИИМдин маалыматы боюнча, учурда Батукаев курал-жарак сактаганы үчүн үч жылга кесилип, Чечен Республикасында жаза мөөнөтүн өтөп жатат.
2019-жылы апрелде Азиз Батукаевдин иши кайра жанданды. Анын бошотулушу боюнча бир катар мурдагы аткаминерлер менен дарыгерлер да суракка чакырылып, кээси камалган. Ал эми мурунку башкы прокурор Аида Салянова, ошол кездеги вице-премьер Шамил Атаханов жана саламаттык сактоо министри Динара Сагынбаева, мурунку башкы прокурор Индира Жолдубаева тергөө менен кызматташууга макул болуп үй камагына чыгарылган.
